Вокзалдағы рейд: құқықбұзушылық жасаған 27 адам ұсталды
Абай облысы бойынша меншікті тілші
Семей бөлімшесіне қарасты теміржол вокзалдары – тәуліктің кез келген уақытында жолаушылар ағыны аса мол болатын бірегей стратегиялық нысан. Сондықтан аталмыш орындарда тексеру жұмыстары тұрақты жүргізіледі.
Желі бойындағы бекеттерден ғана емес, күн сайын жүйткитін жолаушылар пойыздарында да тағылған айыптан жалтарып, іргедегі Ресейге асығатындар көп. Жуырда көліктегі тәртіп сақшыларының күш салуымен «Борышкер» жедел-профилактикалық іс-шарасы өткізіліп, бірталай заңбұзушылықтар анықталды.
Айта кетер бір жайт, Семей станциясындағы желілік полиция бөлімінің қызметкерлерінде жыл басынан бүгінге дейін жалпы сомасы 1 900 950 теңгені құрайтын айыппұл түріндегі 173 әкімшілік құқық бұзушы тұлғаға қатысты іс бар екен. Осының ішінде өндірілмеген айыппұл сомасы 239 775 теңгені құрапты. Міне, аталмыш акция барысында рейдтік іс-шаралар нәтижесінде оның біршамасы сегіз құқық бұзушыдан мемлекет пайдасына өңдірілді. Осы іс-шараға Абай облыстық жеке сот орындаушылары да атсалысты. Сондай-ақ желілік полиция қызметкерлерінен тұратын мобильді топтар құрылды. Олар өз кезектерінде жолаушыларға салынған айыппұлдарды төлеу бойынша түсіндіру, ақпараттандыру жұмыстарын да жүргізді.
– Бір бұл емес, өткізілген жедел-іздестіру іс-шарасы кезеңінде, Семей ст. ЖПб-не әртүрлі құқықбұзушылық жасаған 27 адам жеткізіліді. Оның үшеуіне айыппұл салынса, қалған жолаушылармен құқықтық түсіндіру жұмыстары жүргізілді, – дейді бұл орайда түсінік берген Семей станциясындағы ЖПб-нің әкімшілік полиция бөлімінің бастығы, полиция капитаны Рүстем Абеуов.
Аталмыш сипаттағы іс-шаралар алдағы уақыттарда да тұрақты өткізілмек.