Су тасқыны: Көлік министрі темір жолдағы жағдай туралы айтты
«Қазақстан теміржолшысы» газетінің тілшісі
Бір аптадан бері елді дүрліктірген су тасқыны мәселесі сейсенбі күні Үкімет отырысында сөз болды. Бүгінде Қазақстандағы 5 облыста, Ақмола, Қостанай, Қарағанды, Ақтөбе, Ұлытау өңірлеріндегі магистральдық жолдар бойында су жиналуы байқалады.
Осыған орай автомобиль және темір жолдардың жағдайы мен дайындығы туралы Көлік министрі Марат Қарабаев мәлімет берді. Теміржолда ұлттық оператор тасқынға қарсы 45 пойыз жасақтап, 292 вагон мен 247 платформаны қажетті материалдармен толтырып дайындап отырғанын айтқан ведомство басшысы төтенше жағдайлар министрлігімен бірлесіп 83 су қоймасы мен бөгеттердің жағдайы тексерілгенін жеткізді.
– Барлығы 3 556 дана көпір, 6 356 дана құбыр, 2 024 км кювет және 550 км таулы арық тазартылды. Бүгінгі таңда барлық жерде тұрақты бақылау жүргізілуде. 673 қауіпті орын анықталып, есепке алынды. Олар ойықтар, өткізу қабілеті төмен құбырлар және т.б. Ақтөбе және Қарағанды облыстарында қауіпті учаскелер мен көпірлерде қозғалыс жылдамдығына сағатына 25 км-ге дейін шектеу енгізілді (Қандыағаш – Жем, Ізімбет – Жұрын, Жезқазған – Қоскөл учаскелері). Компания берген деректерге сәйкес қазіргі уақытта теміржолдарда жағдай тұрақты, су басу және бұзылу қаупі жоқ, – деді көлік министрі Үкімет отырысында.
Айта кетсек, биылғы су тасқынына көптеген факторлар әсер еткен. Алдымен өткен күзде жауын-шашын көп түсіп, бұл топырақтың айтарлықтай ылғалдануына себеп болды. Содан кейін қатты аяз әсерінен ол топырақ қатып қалды да, қыста жауған қалың қар қатып жатқан жерге сіңбей, топырақ бетінде мұз қабаттарының пайда болуына әкелді. Бүгінгі таңда Қазақстанның қар басқан аумағы 27%-ды құрайды. Қазіргі таңда батыс өңірлерде судың шамалы төмендеуі және елдің орталық, солтүстік және шығыс бөліктерінде өзендер деңгейінің қарқынды өсуі байқалады.