Су тасқыны: Семейде қауіптің беті сейілді

Семейде, жалпы   Абай облысы бойынша  су тасқыны жағдайы біртіндеп тұрақтанып келе жатыр. Апаттың алдын алу бойынша үйлестірілген жұмыстар теміржол және автокөлік көпірлерін су шайып кетуден аман алып қалды.  

ТЖ департаменті мен әскери бөлімдердің қосымша күштері жұмысқа қосылып,  аймақта ауқымды шаралар атқарылды.   Осыған дейін су басу қаупі төнген, теміржол магистралі өтетін үш ауданның үшеуінде де қауіп сейілді. Сонымен қатар, Аягөз өңірінде жарияланған төтенше жағдай режимі өткен сенбі күні күшін жойды.

Қазіргі таңда тек еріген суды бұру, сондай-ақ автокөлік жолдарының бүлінген учаскелерін қалпына келтіру жұмыстары жүргізіліп жатыр.  Жарма өңіріне қарасты Шар – Өскемен теміржолының Белтерек ауылдық округі тұсында су тасқынына қарсы бөгеттер тұрғызылып төнген апаттың беті қайтарылды. Пойыз қозғалысына кедергі келген жоқ.

Су тасқыны басталғаннан бері тоғыз елді мекенде 22 тұрғын үй су астында қалды. Олардың арасында теміржолшылардың үйлері жоқ. Сол тәрізді қазіргі таңда су тасқыны басталғаннан бері барлық эвакуацияланған 377 адам үйлеріне оралды. Олардың арасында Үшбиік станциясының тұрғындары бар. Қызылсудан келген  залал оның мөлшері анықталғаннан кейін толық өтелетін болады. Азаматтар мен олардың дүние-мүлкінің қауіпсіздігін жергілікті ішкі істер органдары қамтамасыз етуде.  

Су тасқыны кезінде Аягөз ауданында жоғалып кеткен екі адам әлі іздестірілуде. Ол жұмыстарға еріктілермен бірге аягөздік теміржолшы жастар да қатысуда.  

Желі бойындағы жұмыстар штаттық режимде жүргізілуде. Теміржолды кесіп өтетін Аягөз, Шар, Қызылсу, Жарма, Шаған өзендерінің су деңгейі көтерілгенімен қауіпті деңгейде емес. НЖС-6 бөлімшесіне тиесілі 440 көпір, 368 құбыр бақылауда тұр. Магистральға таяу орналасқан су қоймаларына тәуліктік бақылау орнатылды. Осынау орайда құзырлы орындар шығыстағы су тасқыны жағдайы бойынша тек ресми ақпарат көздеріне сенуді сұрайды.