Өндірістік мекеменің басты байлығы – адам

Түркістан станциясының бастығы Қадыр Сырлыбеков пен бас инженер Сұлтан Базарбай, еңбекті қорғау инженері Ләззат Рысбаева мен кәсіподақ ұйымының төрағасы Бауыржан Дүйсебековтің ұйымдастыруымен бірнеше күнге жалғасқан іс-шаралар легі түркістандық теміржолшылар арасында кеңінен насихатталды.

Темір жол қауіпті аймақ болғандықтан, теміржолшылардың еңбек ортасы қауіп-қатерден алыс емес екені белгілі. Алайда, кез келген өндірістік мекеменің басты байлығы – адамдар және оның денсаулығы. Еңбекті қорғау күніне орай техникалық кабинетке тақырыптық баннер ілініп, жұмысшыларға қауіпсіздік ережелері жазылған жадынама таратылды, – дейді еңбекті қорғау инженері Ләззат Рысбаева.

Бүгінде станция теміржолшылары арнайы киім-кешек, қорғаныс құралдарымен түгел қамтамасыз етілген. Зиянды факторларда жұмыс істейтіндердің жалақысына арнайы үстемақы төленіп, кезекті еңбек демалысына қосымша күндер есептеледі және сүт тегін таратылады.

Одан бөлек, Компания басшылығы мен кәсіподақ ұйымының арасындағы ұжымдық шартта жекелеген санаттағы теміржолшылар мен қызметкерлер үшін зейнетке ерте шығуға құқық беретін салалық зейнетақы тағайындау, басқа да әлеуметтік жеңілдіктер бұл қамтылған.

– Жұмысқа кеткен әрбір теміржолшыны үйінде ата-ана, зайыбы мен бала-шағасы күтіп отыр. Сондықтан біздің негізгі міндетіміз – жұмысқа келген жұмысшыны үйіне аман-есен қайтару. Сол үшін компания басшылығы тарапынан кәсіподақ ұйымының қолдауымен еңбек қорғауға байланысты ауқымды іс-шаралар қолға алынуда, – дейді кәсіподақ ұйымының төрағасы Бауыржан Тоқтасынұлы.

Айтулы күнге орай ұйымдастырылған апталық шара аясында, күнделікті жұмыста өзінің тәртібімен, еңбекқорғауға деген жанашыр көзқарасы мен ұстанымымен  көзге түскен бірқатар жұмысшылар – пойыз құрастырушы Бақытжан Молдабаев пен Абзал Бижанов, парк кезекшісі Тәукехан Ағыбаев пен вагон қозғалысының жылдамдығын реттеуші Арнұр Өтебеков, жүк қабылдап-тапсырушылар Өмірсерік Тойлыбаев пен Мақсұт Тамғабаев сынды азаматтар станция басшылығы тарапынан марапатқа ие болды.