Таразда өртке қарсы оқу-жаттығу өтті
"Қазақстан теміржолшысы" газетінің Жамбыл облысындағы меншікті тілшісі
«ҚТЖ» ҰК» АҚ Тараз көліктік оқу орталығы филиалы – Теміржол көлігі персоналын бағалау және дамыту орталығында өрт кезіндегі эвакуациялауға арналған оқу-жаттығу өтті.
Шартты түрде ғимаратта өрт шыққанда дабыл тетігі басылып, белгі берілген сәттен бастап, оқу орталығының қызметкерлері шұғыл іс-әрекетке кірісті. Алдымен жалын бірден өршіп кетпеуі үшін сыртқа шығар есіктен басқа есік-терезелер толық жабылды. Келесі кезекте жұртты сабырға шақырып, шығу белгілерін орындай отырып, ең жақын қауіпсіз жолы арқылы іштегілерді сыртқа шығаруға тырысты.
Арнайы өрт сөндіру көлігі келіп, мамандар іске кіріскенше, орталықтағы оқытушылар мен курсқа қатысушылардың басым бөлігі қауіпсіз орынға шығып үлгерген болатын. Әрі қарай өрт сөндірушілер ереже мен талапқа сай әрекетке көшті.
– Өрт кезінде адамдарды эвакуациялаудың есептік уақыты – өрт туралы хабарландырған сәттен бастап ғимараттан қауіпсіз аймаққа эвакуациялау аяқталған сәтке дейінгі уақыт аралығы десек, орталық қызметкерлері осы кезеңдегі іс-әрекетті ережеге сай атқарды. Жалпы кез келген адам төтенше жағдай кезіндегі ереже-талаптарды білуі тиіс, – дейді оқу орталығының директоры Лашынкүл Күзербаева.
Орталықта эвакуациялау оқу-жаттығуынан кейін еңбек қауіпсіздігі және еңбекті қорғау тақырыбында арнайы ситуациялық жағдайларды талқылау дәрісі өтті.
