Ревизорлар қозғалыс қауіпсіздігін жіті бақылауда

Темір жол бойында қозғалыс қауіпсіздігін сақтауды басты міндет еткен сырбойылық теміржолшылар жылжымалы құрамдардың еш кідіріссіз бөлімше телімдерінен өтуіне қызмет жасауда. Әсіресе аймақ ревизорларының тәулік бойғы жұмысы ерек.

«ҚТЖ» ҰК» АҚ «Жол диагностикалық орталығы» Қызылорда филиалының жол шаруашылығы ревизоры Әмірхан Жүсіпбековтің мәліметіне сүйенсек, өткен жылдың бес айында пойыздық және маневрлік жұмыстар барысында тіркелген 11 қозғалыс қауіпсіздігінің бұзылу жағдайы бөгде мекемелердің еншісіне тиесілі болса, биылғы бес ай ішінде бөлімше бойынша 13 жағдай тіркелген, сондай-ақ локомотивтің істен шығуы, пойыздың бір сағатқа кешіктірілуі секілді бірнеше оқиға орын алған. Тепловоз машинистерінің жедел тежегіш басу жағдайы өткен жылдың есепті мерзімінде 76 мәрте болса, биыл 46 рет тіркелген. Мұның 27-сінде иесіз малдың жол үстіне шығуы, бөгде адамның рельс үстінде жүруіне байланысты 18 жағдай есепке алынған.  

Ал маусым айының алғашқы 10 күнінде Қорқыт станциясы маңы мен Қызылорда жол дистанциясы телімінде бір-бірден иесіз малдың жол бойына шығып жайылып, пойызға басылуы тіркеліпті. Өткен жылдың осы уақытында иесіз малдың жол жағалай жайылуының 3 оқиғасы тіркеліп, мал иелерінің теміржолшылар тарапынан жасалатын ескертулерге құлақ аспайтындығын білдіреді.  

Өңір теміржолы бойында пойыздардың қозғалыс қауіпсіздігінің бұзылмауы үшін аймақтағы 6 ревизор күн-түн демей жұмыс жасап, кез келген қауіптің алдын алуға қырағы қызмет етуде, түсіндіру тобымен де, телім бойында жұмыс жасаған теміржолшылармен де қоян-қолтық араласып, қауіпсіздік үшін жұмыс істеп, назарға ілінген кемшіліктер арнайы жазбаға алынып, оның түзетіліп орнына қойылуы қадағалануда. Пойыздар қозғалысының қауіпсіздігін сақтауды арттыру үшін сала шаруашылықтарын кезектен тыс тосын тексерулер, беймезгіл уақыттағы бақылау жұмыстары ұйымдастырылуда. Мұның бәрі жылжымалы құрамның қауіпсіз қозғалысын сақтау, теміржолшы мен техниканың амандығын талап ететін ережелердің, қағидалардың орындалуын қадағалауға жұмылдырылған іс-шаралар.

– Аймақ бойынша пойыздар қозғалысының қауіпсіздігін қамтамасыз етуге қатысты түрлі шаруалар атқарылуда. Иесіз малдың жол бойын жағалай жүруіне байланысты жергілікті тұрғындармен түсіндіру жұмыстары жүргізіліп, атқарушы билік органдарына қатынас хаттар жолданып, мал шаруашылығын кәсіп еткендерге теміржолдың аса қауіпті аймақ екендігі түсіндірілуде. Алайда, нәтиже көңіл көншітерлік емес. Ескерту, қатынас хаттарға берілген жауап мардымсыз, иесіз малдың жол жағалай жайылуы әлі тыйылар емес. Дегенмен тұрғындармен теміржолдың қауіпті аймақ екендігін ескерткен түсіндіру жұмыстары жалғасып, рейдтер өткізілуде, – дейді ревизор Әмірхан Жүсіпбеков.  

Оның айтуынша, биылғы жыл басынан бері 5 рет жолаушылар пойызының тепловозына мал басылу жағдайында зақым келтірілген. Осы жағдайдың орын алуына орай ревизорлар аппаратының басшысы Алмат Молдашев пен мекеме басшыларының бірлескен талдау жұмысын жүргізу ревизорлар аппаратының күн тәртібінде өзектілігін жоймаған.  

– Пойыздардың қауіпсіз қозғалысын сақтауды арттыру мақсатында адам көп өтетін жерлерге арнайы белгілер мен зиг-заг тәрізді есіктер қойылған. Ал қысқартылған теміржол өткелдерінен иесіз малдың өтуіне байланысты тепловоз машинистерінің жедел тежегіш қолдануының көбеюіне байланысты ревизорлар аппараты тарапынан уақытша кезекшілер қоюға ұсыныс берілді. Сонымен қатар жаз маусымында теміржол көлігін пайдаланушы жолаушылардың көбеюінен Қамбаш, Шөміш, Жалағаш, Тереңөзек станциялары маңындағы теміржол өткелдерін қайта ашу туралы компания басшылығына түсіндірме хаты жолданды, – деп түйіндеді сөзін Әмірхан Жүсіпбеков.