Қозғалыс қауіпсіздігін бұзғандар тәртіптік жазаға тартылды
Атырау облысы бойынша меншікті тілші
Атырау жүк тасымалы бөлімшесі бойынша өткен жылы қозғалыс қауіпсіздігін бұзудың 5 жағдайы тіркелген. Әрбір жағдай бойынша жедел талдау жүргізіліп, кінәлі қызметкерлер тәртіптік жазаға тартылды.
Орын алған 1 оқиға, 4 оқыс оқиғаға байланысты тиісті салалар мен ревизорлар құрамның қатысуымен жан-жақты талдау жүргізілді. Нәтижесінде қозғалыс қауіпсіздігінің бұзылуына кінәлі тұлғалар анықталып, тәртіптік жазаға 21 қызметкер тартылды, оның ішінде: 12 қызметкер қатаң сөгіс, 7 адам сөгіс алып, тағы 2 қызметкерге ескерту берілді. Сонымен қатар, 3 қызметкермен еңбек шарты бұзылды, 2 қызметкер зейнет жасына жетуіне байланысты және 1 қызметкер өз өтініші бойынша жұмыстан кетті.
Қозғалыс қауіпсіздігін бұзудың жағдайлары бойынша станция, локомотив және вагон деполары қызметкерлері арасында техникалық сабақтар күшейтіліп, тежегіш жабдықтарымен байланысты жұмыстарды қайта таныстыру, жолаушылар және жүк пойыздарында тежегіштерге сынау жүргізуді, пойыз құрастырушы мен локомотив бригадалары арасындағы сөйлесу регламенті тәртібінің орындалуын, маневрлік жұмысты жүргізу талаптарын сақтау, локомотивтерді пайдалану жөніндегі нормативтік-техникалық құжаттамалардың орындалуы тыңғылықты қарастырылды. Мекеме басшылары тарапынан қозғалыс қауіпсіздігі бұзылуының алдын алу бойынша кенеттен тексерулер, теміржол маңындағы елді мекендердің тұрғындары арасында адамдардың станция аумақтарында жүру тәртібі және мал жаю ережелері туралы түсіндіру жұмыстары жиіледі. Бөлімшеде 2024 жылдың 12 айында өндірістік жарақат алудың жағдайы тіркелмеген.