Қоймадан өрт шықты...
Ақтөбе облысы бойынша меншікті тілші
Дизель отынын сақтайтын резервуар әп-сәтте қызыл жалынға оранды. Өрттің қалаға тарау қаупі бар. Осындай сценариймен басталған оқу-жаттығу өрт сөндіру пойызының дайындығын пысықтады.
Ақтөбе станциясында ұйымдастырылған кешенді оқу-жаттығу шарасы шынайылыққа жақын өтті. «ҚТЖ» ҰК» АҚ Ақтөбе магистральдық желі бөлімшесіне қарасты өрт сөндіру пойызы мен өртке қарсы бөлім қызметкерлері жоғары дайындықтарын көрсеткен шарада сценарий бойынша Отын ресурстық орталығынан өрт шықты. Жанар-жағармай қоймасында техникалық қауіпсіздік сақталмаған. РБС-2000м3 дизель отынын сақтайтын резервуар отқа оранып, жалынды бірін ші болып байқаған жергілікті тұрғындар 101 қызметіне хабарлайды. Қоңырауды қалалық горнизоны өрт сөндіру және авариялық-құтқару қызметінің диспетчерлері қабылдап, оқиға орнына МӨСБ-2 АЦ-5-40, АЛ-50, ЦМК-3 техникалары мен өрт сөндіру пойызы жіберілді.
Қойма елдімекенге жақын орналасқандықтан өрттің таралу қаупі жоғары болды. Шұғыл әрі тактикалық әрекеттің арқасында жалын лезде ауыздықталып, қойма аумағы залалсыздандырылды.
Ақтөбе өрт сөндіру пойызының бастығы Бауыржан Файзолла кешенді оқу-жаттығу шарасын өзі бақылады. Жеке құрамнан 17 адам қатысты. Оқиға кезінде газдан уланған қызметкер шұғыл далалық емханаға жеткізілді. Улы газ ауаға тарап, елдімекен тұрғындарына зиян келтірмес үшін арнайы көбік қолданылды. Осылайша, тапсырма тиянақты, шапшаң әрі сауатты қимылдың арқасында сәтті аяқталды.
«Тактикалық оқу-жаттығу жоғары деңгейде өтті. Өрт сөндіру бойынша жергілікті қызмет өкілдері бірлесіп, дайындық пысықталды. Өрт сөндіру кезінде су және бүрікпе көбік пайдаланылды. Барынша шынайы өткен жаттығу апаттық жағдай орын алған жағдайды жұмыс істеуге жеңіл болады. Себебі әр қимыл маңызды», – деді Ақтөбе магистральдық желі бөлімшесінің бас инженері Темірбек Елғонды.
