Теміржолдағы төтенше жағдай: Шиеліде өрт сөндірушілер кәсіби шеберліктерін шыңдады

Қызылорда магистральды желі бөлімшесіне қарасты Шиелі өрт сөндіру пойызы (ПП-30) теміржолшыларының кәсіби дағдысын шыңдау мақсатында, Шиелі станциясында, құрылымдық мекемелермен бірлесіп өрт тактикалық жаттығуын өтті. Шиелілік өрт сөндірушілер теміржол бойындағы төтенше жағдайға қарсы тактикалық-оқу жаттығуы барысында қауіпті жүктің тасымалында болуы мүмкін қауіптен арылудың жолын қарастырды. Осылайша өрт сөндіруші сарбаздардың төтенше жағдайға дайындығы пысықталды.

Қауіпті жүкті тасымалдау – теміржол саласындағы ең жауапты да күрделі міндеттердің бірі. Себебі, бұл жерде әр секунд, әр қимыл-адам өмірі мен инфрақұрылымның қауіпсіздігіне тікелей әсер етеді. Осы ретте Шиелі станциясында «Қауіпті жүкті теміржол транспортымен тасымалдау кезіндегі қауіптің-жүктің ағуын тоқтату» тақырыбында өткен тактикалық-оқу жаттығуы кәсіби шеберлік пен дайындықтың нақты көрсеткіші болды.

Жаттығуға Шиелі өртке қарсы күрес пойызының ұжымы, аудандық төтенше жағдайлар бөлімі, Қызылорда электрмен жабдықтау, сигнализация және байланыс, жол дистанциясы мекемелері және әскери-теміржол қызметінің сарбаздары қатысты. Жаттығуға Шиелі өртке қарсы күрес пойызының бастығы Ғалымжан Болғанбаев және құзырлы органдардың басшылары басшылық жасап, бақылау өткізді.

Сағат 09:59-да станцияның бесінші жолына 2818 жүк пойызы тоқтаған. Сол сәтте оның құрамындағы «Бензин» деп белгіленген жетінші вагоннан түтін байқалады. Жол қызметкерлері жедел түрде тиісті құрылымдарға хабарлап, үш минут ішінде қауіпті вагон құрамнан ажыратылып үлгерді. Жағдай өрт сөндірушілердің дайындығын бағалау үшін жасанда болса да теміржолшылардың әреткеті сенімді, нақты болды. Сағат 10:10-да өрт сөндіру пойызы оқиға орнына келіп, жағдайды бағалап, бағыт-бағдарын анықтап, нақты қимылға көшті. Сағат 10:08-де өрт ошағы оқшауланып, 10:14-те толықтай сөндірілді. Жаттығу 10:35-те сәтті қорытындыланды.

«Жаттығу барысында әріптестерімнің шапшаң ойлап, дұрыс шешім қабылдауы, бір-бірімен ымыраласып, үйлесімді қимылдауы, бағытты нақты анықтап, өртті дер кезінде оқшаулап, сөндіре алуы – осындай тәжірибелік жаттығулардың пайдасын көрсетеді. Теорияны тәжірибемен ұштастыру – мамандардың кәсіби дайындығын арттырады. Кәсіби дайындық – қауіпсіздіктің кепілі», - дейді Өртке қарсы күрес пойызының бастығы Ғалымжан Болғанбаев.

Ерлік еңбекпен өлшенетіндіктен, теміржолшылардың жаттығу кезіндегі әрекеті, қимылы, тактика, амал-айлалары бәрі назардан тыс қалмай сарапқа салынды. Жаттығу барысында кәсіби шеберлігімен ерекше көзге түскендер де аз болмады. Атап айтқанда, аға өрт сөндіруші Жалғас Ибатаев, бөлімше басшылары Оңал Самат пен Жұмасейтов Болат, өрт сөндірушілер Жанабеков Жандос пен Жанайдарұлы Досхан, көлік жүргізушілер Алдан Қасиет, Шайхымбеков Ахмет, Өтегенов Нұрбек өздерінің шеберлігін дәлелдеді. Олар қиын сәтте табандылығы мен ұйымшылдығы арқылы әріптестеріне үлгі бола білді.

Мұндай жаттығулар қауіпсіздікті қамтамасыз етудегі үздік тәсіл. Себебі шынайы жағдайда дәл осындай дайындық пен дағды өмір мен өлім арасындағы басты өлшемге айналады.