Қызылордалық вагон қараушылар қауіп төндіретін ақауларды анықтады

Қазалы вагон пайдалану депосына қарасты Қызылорда техникалық қызмет көрсету қосынының вагон қараушылары Бағдәулет Айтқұлов пен Құрманбек Асқаров табылуы өте қиын ақауды анықтап, қауіптің алдын алды. Ақаулы вагондардың бірі 1 қазан күні таңертең 07 сағат 35 минутта Қызылорда бекетіне келіп тоқтаған пойыздан анықталса, екіншісі 17 қазанда түнгі ауысымда табылды. Алғашқысында букс торабы бекітпесінің М-20 бұрандасы сынған, екінші жағдайда букс ролигі сеператоры сынғаны анықталды.

– Біздің Қызылорда ТҚК қосынының вагон қараушылары Құрманбек пен Бағдәулет – бұған дейін де талай рет вагоннан ақау тауып, қырағылығымен танылған теміржолшылар. Қазан айында жігіттердің анықталуы өте қиын және сирек кездесетін ақауды табуы олардың өз кәсібін бес саусағындай білетін, нағыз шебер вагон қараушылар екенін тағы дәлелдеп отыр, – деді әріптестері жайлы Қызылорда ТҚК қосыны басшысы Рүстем Ұзақбаев.

Пойыз бекетке кіргенде қауіпсіздік қосынында тұрып, жылжымалы құрамды бақылаудан өткізіп алып, пойыз тоқтағаннан кейін жағалай жүріп әр вагон доңғалағын ұрғылап, тексеріп шығатын сары жилет киіп, қолына рация мен балға ұстаған вагон қараушыларды барлық станцияда көреміз. Олардың құлағына доңғалақты не буксты кішкене балғамен соққанда естілетін дыбыс та әбден жаттанды болған. Оның үстіне заманауи технологияның да көмегі бар. КТСМ-02 қондырғылары жүріп келе жатқан құрамның пәленінші вагоны дұрыс жұмыс жасамай сыр беріп келеді деп алдын ала байбалам салып, «тревога 1-2» сигналын беріп, вагон қараушыларға едәуір көмек береді. Осындай сигналдар көмегімен бекетке келген құрамадан талай «күдікті» вагон анықталып, құрамнан ажыратылды. Ал бұл жолы таңқаларлық жағдай да сол, КТСМ- 02 қондырғысы қауіпті ақау жайлы ешқандай белгі бермеген. Демек, заманауи техниканың да «көрмей» қалатыны болады екен, ал біздің қос вагон қараушы сол техниканың өзі анықтай алмаған ақауды тауып отыр. Нағыз кәсіби қырағылық деген осы шығар?!