Әлемде саяхатшылар арасында экологиялық талаптарға сай демалыс түрлеріне қызығушылық артып келеді. Табиғат аясында тынығу, көрікті теміржол бағыттарымен сапарлау және туристер көп бара бермейтін мекендерді аралау шетелдік саяхаттың әсерін күшейтетін маңызды факторға айналған. Бұл туралы Trip.com компаниясының тұрақты туризмге қатысты жаңа зерттеуінде айтылған, деп хабарлайды Rail-news.kz.
Климаттың өзгеруі мен ауа райының қолайсыз құбылыстары туристік бағыттарды таңдауға да ықпал ете бастады. Сондықтан демалушылар сапардың қай мезгілде өтетініне, қандай көлікпен қатынайтынына және баратын жерінің экологиялық жағдайына көбірек мән береді.
Trip.com Sustainable Travel Consumer Report зерттеуіне әлемнің төрт аймағындағы жиырма тоғыз елден 8777 адам қатысқан. Сауалнама нәтижесіне сәйкес, респонденттердің 37,2 пайызы демалыс орнын таңдағанда ауа райына байланысты қолайсыздықтар қаупінің төмен болуын ескереді. Бұл көрсеткіш Еуропада соңғы уақытта тіркелген аптап ыстық пен климаттық өзгерістердің саяхатшылар шешіміне әсер етіп отырғанын аңғартады.
Зерттеуге қатысқандардың 75,4 пайызы тұрақты даму қағидаттарын сапарды жоспарлауда маңызды фактор деп санайды. Ал 56,8 пайызы саяхат кезінде экологияға зияны аз баламаларды әдейі таңдауға тырысатынын айтқан.
Trip.com Group компаниясының бас директоры Джейн Санның пікірінше, саяхаттың сапасы қоршаған ортаның жағдайымен және жергілікті қауымдастықтардың әл-ауқатымен тығыз байланысты.
Оның айтуынша, табиғи ортаны сақтау, жергілікті мәдениет пен тарихи мұраға құрметпен қарау туристік саланың болашақта да дамуына мүмкіндік береді. Ал тұрақты туризм саяхатшыларға табиғатты тамашалау, теміржолмен көрікті бағыттар арқылы жүру және көпшілікке беймәлім мекендерді ашу сияқты жаңа мүмкіндіктер ұсынады.
Жастар табиғат аясындағы демалысқа басымдық береді
Зерттеу нәтижесі саяхатшылардың жас ерекшелігіне қарай таңдауы да әртүрлі екенін көрсетті. Жастар арасында теміржол сапарлары, табиғат аясындағы белсенді демалыс және экологиялық талаптарды ұстанатын қонақүйлерге сұраныс жоғары.
Ал жасы үлкен саяхатшылар адам аз жиналатын тыныш орындарды және туристік маусымның қызған шағынан тыс уақытта демалуды жөн көреді.
Әсіресе Z буыны өкілдері тұрақты туризмге белсенді қызығушылық танытып отыр. Олардың 44,3 пайызы сапарды жоспарлау кезінде экологиялық тұрақтылықты өте маңызды деп есептейді. Салыстыру үшін, аға буын өкілдері саналатын бэби-бумерлер арасында бұл көрсеткіш 23 пайызды құраған.
Дегенмен саяхатшылар үшін баға мәселесі әлі де маңызды. Сауалнамаға қатысқандардың 32,9 пайызы экологиялық талаптарға сай демалыс үшін әдеттегі шығыннан тек 1-5 пайыз артық төлеуге дайын екенін жеткізген.
Соған қарамастан, Z буыны мен миллениалдардың 10,6 жуығы табиғатқа зияны аз саяхат түрлері үшін қосымша қаражат жұмсауға қарсы емес. Бұл туристердің бағаға мән бергенімен, сапалы әрі экологиялық жауапты демалысқа ақша төлеуге де дайын екенін көрсетеді.
Табиғат аясындағы демалыс пен теміржол сапарлары танымал
Зерттеуде саяхатшылардың қандай демалыс түрлерін экологиялық тұрғыдан тиімді әрі әсерлі деп санайтыны да анықталған.
Респонденттердің 41,6 пайызы табиғи аумақтарды аралап, қоршаған ортамен жақын танысуды таңдаған. Екінші орында көрікті теміржол бағыттарымен сапарлау тұр. Оны қатысушылардың 34,1 пайызы атаған.
Ал 32,7 пайызы туристер сирек баратын, көпшілікке аса таныс емес бағыттарды таңдауға ниетті. Қонақүйдің экологиялық саясатына мән беретіндер үлесі 31,9 пайыз болса, 29,6 пайызы демалысты туристік маусымның қызған шағынан тыс уақытта ұйымдастыруды жөн көреді.
Бұл деректер туристік бағыттың танымал болуы ғана емес, оның табиғи ерекшелігі мен қоршаған ортаға әсері де маңызды бола бастағанын көрсетеді.
Қолайсыз ауа райы туристік жоспарларды өзгертуде
Климаттың өзгеруі саяхатшылардың жоспарына тікелей әсер етіп отыр. Сауалнамаға қатысқандардың 29,9 пайызы ауа райының қолайсыздығына байланысты сапарын кейінге қалдырған немесе бағытын қайта жоспарлаған.
Тағы 23,6 пайызы саяхат уақытын не маусымын өзгертуге мәжбүр болған. Ал 21,9 пайызы бастапқы таңдаған туристік бағытынан бас тартқан.
Демалыс орнын таңдағанда инфрақұрылым мен табиғи мұраны сақтау мәселесі де назардан тыс қалмайды. Респонденттердің 56 пайызы қоғамдық көлігі жақсы дамыған әрі көміртек шығарындыларын азайтатын қатынас түрлері бар бағыттарға қызығушылық танытқан.
Ал 50,6 пайызы табиғи және мәдени мұраны қорғауға басымдық беретін туристік орындарды таңдаған. Саяхатшылардың 37,2 пайызы ауа райына байланысты кедергілер туындау ықтималдығы төмен өңірлерге баруды жөн көреді.
Жалпы, зерттеу туристік таңдауда жаңа үрдіс қалыптасып келе жатқанын аңғартады. Бұрын демалыс орнын таңдауда баға, жайлылық пен танымал бағыттар басты рөл атқарса, қазір табиғатты қорғау, көлік қолжетімділігі, жергілікті мәдениетті сақтау және климаттық тәуекелдер де маңызды өлшемге айналып отыр. Бұл үрдіс алдағы уақытта туристік индустрияның даму бағытына да ықпал етуі мүмкін.
