Шымкентте жергілікті тұрғындардың бейқамдығынан 9 айда 5 адамды пойыз басты
Шымкент қаласы бойынша меншікті тілшісі
Шымкент жол дистанциясы қызмет көрсететін аумаққа пойыздар қозғалысы қауіпсіздігін сақтау мақсатында 164 шақырымға қоршау қойылған. Соған қарамастан жыл басынан бергі тоғыз айда бес адамды пойыз басып, он шұғыл тежеу қолдану оқиғасы орын алған. Ең өкініштісі, теміржол бойында кетіп бара жатқан жастар құлаққап тағып алғандықтан пойыздардың ескертпе белгілерін естімей қалып, қайғылы оқиғалар орын алып жатады. Сонымен қатар дистанция аумағында қараусыз малды басу бойынша 17 оқиға, ал иесіз жайылған төрт түлік кесірінен 11 шұғыл тежеу қолдану оқиғасы тіркелген. 14 малдың иесі анықталып, әкімшілік хаттама толтырылды.
«Теміржол бойында орналасқан жергілікті тұрғындармен біз желілік полиция қызметкерлерімен бірлесе отырып, тұрақты түрде түсіндірме жұмыстарын жүргіземіз. Бірақ сол жұмыстарымыз, өкінішке орай, еш нәтиже бермей отыр. Мал жолға шығып кетпеуі үшін қойылған қоршаудың сымын тұрғындар қиып тастап, төрт түлігін жол жиегіне жаюды, белгіленбеген жерлерден айдап өтуді, қараусыз қалдырып кетулерін қояр емес. Тұрғындарға айыппұл мал егесінен өндіріледі, мөлшері – 28 974,5 теңге. Содан өз малын танып тұрса да «менікі емес» дейтіндер көп», – дейді ПЧ-53 жетекші инженері Ақтолқын Жоланова.
Өткен тоғыз айда 5594 тұрғын мен 1240 автокөлік жүргізушісіне түсіндірме жұмыстары жүргізіліп, 2464 ескертпе қағазы таратылған. Полиция қызметкерлерімен бірлескен 32 рейдтік шара өткізіліп, аудан және қала әкімдеріне 38 мәлімдеме хат жолданған. Алайда тұрғындардың салғырттығы мәселені қайта-қайта ушықтырып отыр дейді теміржолшылар.