Темір жол бойында жүріп-тұру ережесінің сақталуы «Қандыағаш» станциясында да өзекті

Темір жол қашан да қауіпті. Алайда тұрғындардың бұл ескертуді көп жағдайда елей бермейтінін айтқан теміржолшылар тағы да дабыл қақты. Өйткені, азаматтардың өз салғырттығының салдарынан зардап шегу оқиғасы тыйылар емес. Бүгінде Қандыағаш станциясында «Абайлаңыз! Басып кету қаупі бар!» акциясы өтіп жатыр. Вокзал қызметкерлері мен тәртіп сақшылары жолаушыларды қозғалыс ережесін қатаң сақтауға шақыруда. Үш күндік шара кезінде 15 әкімшілік құқық бұзушылық анықталды. Олар теміржолды белгіленбеген жерден кесіп өтуге және рұқсат етілмеген жерде сауда жасауға қатысты. Теміржолшылар сондай-ақ ата- аналардың балаларға қауіпсіздік ережелерін жиі ескертіп, жіті бақылауға алуларын сұрайды. Мектептерді аралап, балаларға дәріс оқуда. Мал басу оқиғалары да азаймай отыр екен. Теміржолдың айналасына мал жаюдың өз тәртібі, ережесі бар. Дегенмен, көбіне қараусыз жайылып жүрген төрт түлік – пойыздардың қалыпты жұмысын бұзуға себепші. Оның салдары пойыздардың кідіруіне, локомотивтердің бұзылуына әкеп соғуда, ең бастысы, жолаушыларға қауіп туғызады. «Шұбарқұдық-РзД 102» жолы аралығында №2881 жүк пойызы жылқы басып кетті. Мал иесі ҚР Әкімшілік құқық бұзушылық кодексінің 559-бабының 1-бөлімімен темiржолдардың бөлінген жолағында мал жаю қағидаларын бұзуы бойынша жауапкершілікке тартылды. Осылайша, мал иесі ақ-адал өсіріп отырған малынан бір айрылса, айыппұл төлеп екі шығынға батпақ», – дейді Қандыағаш желілік полициясының аға инспекторы Құлманова Самал. Теміржолшылар автокөлік иелерін де өткелден өтерде қауіпсіздік қағидаларын қаперге алуды ескертеді. Өйткені кей жүргізушілер асығыстық жасап өте шықпақ болғанымен, жүйткіген пойыз әп-сәтте жетіп келіп қапы қалып жататыны жалған емес. Сондықтан, жол қысқартам деп, өміріңізді қысқартып алмаңыз деген ескерту орынды.