Атырау жол бөлімшесінде арнайы киім мен құрал-сайман жеткілікті

Жұмысшыларды жазғы-қысқы арнаулы киім мен қорғану құралдарымен қамтамасыз ету – тәуекелдердің алдын алу кепілі. Атырау жол бөлімшесінде бұл бағыттағы жұмыстар өз деңгейінде орындалып отыр, деп хабарлайды Rail-news.kz. Биылғы жылдың 9 айындағы көрсеткіш бойынша екі мыңдай ерлер мен әйелдер аяқ киімі мен етіктер, үш жүздей жұп бас киім, 1738 сигналды жилет-кеудеше, 1348 жиынтық х/б костюм, басқа да құралдар сатып алынып, жұмысшыларға таратылған. Оның ішінде төрт жүзге жуық медициналық қобдиша, бір және көп реттік маскалар мен қолғаптар, қорғаныс каскалары бар. Тежегіш башмақтар саны жеті мыңға жуық, олардың ішінде жаңасы мен ескісі де бар. Жұмысқа тек пайдалысы ғана қолданылуда. Атырау, Ганюшкино станцияларында вагон таразылар, Сағыз, Мақат станцияларында М63М анеморумбометрлері де қолданысқа жарамды күйде екені анықталды. Станциялар мен вагон деполарында радиостанциялармен қамтамасыз етілу жеткілікті жағдайда – 281 данасы қолданыста. 2019 жылы «Связь Р-45» радиостанциясы алынған болатын, мамандардың айтуынша, әзірге олардың жұмысына шағым жоқ. Сол секілді вагон қараушылар үшін 210 қол шамы қолданыста жүр. Теміржолшылар өмірінің тең жартысын жол бойында өткізетін мамандық иелері болғандықтан жұмыс орындарында шәйнегі қайнаулы, тамағы пісулі болуы, тамақтану құралдары да жеткілікті болуы керек. Соған сәйкес, еңбек жағдайын жақсарту мақсатында Ганюшкино, Атырау, Ақжайык, Теңдік, Қарабатан, Сағыз, Құлсары, ВЧДЭ-1 Атырау станцияларында ас ішу бөлмелерінде барлық қажетті жағдай жасалған. Станцияларда «Қауіпсіздік диалогы», «Өндірістік қауіпсіздіктің он екі негізгі ережесі», «Хенрих травматизмінің пирамидасы» тақырыптарында көрнекі жадынамалар ілінген. Сол секілді медициналық мекемемен «Инфаркт пен инсульттің алдын алу» жадынамасы әзірленіп, «Бірінші медициналық көмек көрсету» бойынша жедел жәрдем мамандарымен тренинг өткізілген.