Ақтөбеде қар тазалау жұмыстарына дайындықты пысықтау үшін оқу-жаттығу өтті
Ақтөбе облысы бойынша меншікті тілші
«Қазгидромет» ұсынған ұзақ мерзімді ауа райы болжамына сәйкес 6 қараша күні Ақтөбеде ылғалды температура сақталып, соңы қалың қарға ұласты. Станциясы аумағындағы теміржолдарды қалың қар басты. Жылжымалы құрамның кідірісін болдырмас үшін аймақ теміржолшылары екінші деңгейлі қар тазалау жұмыстарын шұғыл ұйымдастыруы тиіс. Өңірде қар тазалау жұмыстарына арналған оқу-жаттығу сценариі осылай басталды. Ақтөбе ЖТ бөлімшесі директорының орынбасары Айбек Таласов пен магистральдық желі бөлімшесі басшысының орынбасары Темірғали Көштаев құбылмалы ауа райын ескеріп, қар тазалау жұмыстарын ұйымдастыруға шұғыл бұйрық берді. Әрі қарай станция кезекшісі барлық мекемелерге хабарландыру жасап, қызметкерлерді екінші деңгейлі қар тазалау жұмыстарына шақырды. Жол дистанциясына теміржол мекемелерінен 60-тан аса жұмысшы жиналды. Теміржолшыларға техникалық қауіпсіздік ережесі түсіндіріліп, белгі беру күртешелері таратылды. Тез арада топ-топқа бөлінген олар күректерін алып станция аумағына жиналды. Қар тазалау жұмыстарына жолды қардан ашуға арналған арнайы пойыз да жұмылдырылды. Ақтөбе жол дистанциясының бас механигі Серік Түменбаевтың айтуынша, өңірде қар тазалайтын бес дана СМ-2 техникасы бар. Бір техника сағатына 340 куб қар тазалау мүмкіндігіне ие. Бір метрге дейін биіктіктегі қарды қарпуға қауқарлы. Барлық техника күзгі байқауда тексеруден өткен. Қысқы жұмыстарға сақадай сай дайын тұр.
«Ақтөбе аумағынан 62 теміржолшы қар тазалауға шықты. Тоқтаусыз жауған қалың қар салдарынан сағат 9:40-та басталған тазалау жұмыстары 17:00-ге дейін жалғасты. Станция аумағынан 14 700 м куб қар шығарылды. Жылжымалы құрамның кідірісі болған жоқ», – деп хабарлады Ақтөбе станциясының басшысы Нұрлан Ермағамбетов.
Бұл штаттан тыс жағдайлардың алдын алу үшін темір жолды тазалауға кететін уақыт нормативін ескере отырып, барлық арнайы техника қозғалысы- ның бағыттары және бекітілген учаскедегі қар тазалау технологиясы бойынша өткен оқу-жаттығу болатын. Теміржолшылар өздеріне берілген міндетті белгілі уақыт аясында жоспардағыдай аяқтады.