Семейде қауіпсіздік мәселесі бойынша тұрғындар арасында түсіндіру жұмыстары жүргізілуде
Абай облысы бойынша меншікті тілші
Бүгінде Семей ЖТ бөлімшесі бойынша желі бойындағы қауіпсіздік мәселесі күн тақырыбынан түспей тұр. Бұл орайда сақтық шараларын күшейту мақсатында түрлі акциялар да өткізілуде. Мысалы, жуырда бөлімше көлемінде «Тоқтаңыз. Басып кету қаупі бар!» атты акцияның кезекті үшінші кезеңі өткізілді. Аталмыш шара барысында Семей станциясының желілік полиция бөлімі қызметкерлері арнайы штаб құрып, жоспар аясында жұмыстар жүргізді. Қоғамдық қауіпсіздік шаралардың күшейтілуіне желі бойындағы барлық мекемелер атсалысты.
– Акцияның мақсаты – пойыз- дардың адамдарды басып кету фактілерінің алдын алу, сондай-ақ, балаларды теміржол бойындағы қауіпсіздік ережелерін сақтауға дағдыландыру. Соның аясында бөлімше көлемінде тұрғылықты халыққа түсіндіру жұмыстары жүргізілді. Әсіресе, теміржолға жақын орналасқан елді мекендерде жұртшылықпен кездесулер, әңгімелесулер өткіздік, – дейді бұл орайда Семей станциясындағы ЖПБ әкімшілік полиция бөлімінің бастығы Рүстем Әбеуов.
Мұндай түсіндіру шараларына теміржол вокзалының қызметкерлері де қатысып, құқықтық тақырыпта дәрістер өткізілді. Сондай-ақ, кеңес беру мақсатында жолаушы пойыздарында үш мәрте жолаушылаған халықпен кездесу ұйымдастырылды. Оның аясында буклеттер мен ескертулер таратылды. Әрине, алдын алу жұмыстары барысында рейдтік шаралардың да берері көп. Бұл ретте желілік полиция «ӘТЖК» ЖШС-нің Семей филиалы қызметкерлерімен бірлесіп, бірнеше рейд өткізді. Теміржол бойында жаяу жүргіншілердің рұқсат етілмеген жерден кесіп өту фактілерінің алдын алып, олармен түсінік жұмыстарын жүргізді. Әсіресе балалы әйелдер мен студент жастарды қауіпті аймақта жауапсыздық салдары неге соқтыратынын нақты фактілермен таныстырып, абай болуға шақырды.