Семейде «Тоқтаңыз, басып кету қаупі бар!» акциясы аясында ереже бұзған 61 азамат анықталды
Абай облысы бойынша меншікті тілші
Өткен аптада Семей ЖТ бөлімшесі бойынша «Тоқтаңыз, басып кету қаупі бар!» атты тақырып аясындағы акцияның төртінші кезеңі өткізілді, деп хабарлайды Rail-news.kz. Шара барысында Семей станциясының желілік полиция бөлімінің қызметкерлері арнайы жұмыс штабын құрды. Оның құрамына қоғамдық қауіпсіздік және басқа да қызметтерден 18 адам жұмылдырылды. Тәртіп сақшылары теміржол мекемелері өкілдерімен бірлесіп, түсіндіру жұмыстарын жүргізді. Желі бойына жақын орналасқан елді мекен тұрғындарымен төрт мәрте кездесу өткізілсе, теміржолға таяу орналасқан оқу орындарында сегіз рет арнайы дәрістер ұйымдастырылды. Сонымен қатар, пойыз бастығымен бірге жолаушылар пойыздарында бес мәрте жиын өткізіліп, арнайы дайындалған буклеттер мен ескертпе қағаздар таратылды. Әрине, рейдтік шаралар барысында өз өмірін қауіпке тігіп, тоқтап тұрған жылжымалы құрамның астынан өтуге әрекет жасаған азаматтар да анықталды. Жалпы, теміржол бойындағы әртүрлі әкімшілік құқық бұзғандары үшін 66 азамат бөлімшеге жеткізілген. Оның 61-і теміржолдың белгіленбеген жерінен өткені үшін айыпты болып саналған.