Науалыда астық тиеген пойыз аударылды

Сарышағаннан Қарағандыға қарай, Мойынтыға жетпей, Науалы станциясында жүк пойызы апатқа ұшырады. Әзірге белгілісі, төтенше оқиғаға вагондардың бірінің бүйірлік рамасының морт сынуы себеп болған. Қазіргі таңда мамандар шығынның нақты көлемін есептеп үлгерген жоқ. Алайда, біз оқиғаның мән-жайын білуге тырыстық.

  Жамбыл жүк тасымалы бөлімшесі директорының міндетін атқарушы Дүйсенбек Сыдықов пен Жамбыл магистральдық желісінің басшысы Сұлтан Боранбаев төтенше жағдай орын алған аумақта жүргендіктен телефон арқылы тілдесуге ғана мүмкіндік болды.

Жүк пойызына Павлодар аймағының Северный станциясынан астық тиелген екен. Ол Жамбыл жүк тасымалы бөлімшесі арқылы Ауғанстанның Хайратон станциясына бет түзеген.

Сарышаған қалпына келтіру пойызы басшы- сының орынбасары Марат Ахметов нысандағы негізгі жұмыстардың аяқталғанын айтты.

Сарышаған жол дистанциясының директоры Берікбол Рақышевтің айтуынша, бір жолдың 125 метрі жарамсыз болып қалыпты. Ал екінші жолдың 900-метрге жуығының шпалдарын ауыстыру керек. Сонымен қатар екі стрелка бұрмасы бүлінген.

Жамбыл учаскесі бойынша қозғалыс қауіпсіздігі жөніндегі салалық өңірлік тексеруші Дархан Құндызбековтің айтуынша, апат орын ала сала тиісті орындарға хабар беріліп, жергілікті теміржолшылар барлық қозғалысты тоқтатып, нұсқауға сәйкес әрекет еткен. Қалпына келтіру пойыздары да дер кезінде келіп жеткен. Бет қатталып жатқанда «ҚТЖ» АҚ баспасөз қызметі Науалы станциясындағы пойыздар қозғалысы толық қалпына келтірілгенін мәлімдеді. Жолдан шығып кету салдарын жоюға жалпы 200-ге жуық теміржолшы жұмылдырылған. Оқиға орнында қазір арнайы құрылған комиссия жұмыс істеп жатыр.

«Вагондардың жолдан шығып кету себебі – ресейлік вагонның бүйір рамасы сынып кеткен. Тексеру қорытындысы бойынша келтірілген залал үшін өтем кінәлі тарапқа белгіленген тәртіппен талап етілетін болады» делінген баспасөз қызметінің хабарламасында.