Арыстықтар арнайы іс-шара кезінде вагондардан оншақты ақау тапты
Шымкент қаласы бойынша меншікті тілшісі
Арыс вагон пайдалану депосы – Шымкент жүк тасымалы бөлімшесі бойынша аймақтағы вагон шаруашылығының бары мен жоғын түгендейтін бірден бір мекеме.
Құрамында алты техникалық қызмет көрсету, он екі бақылау бекеті мен алты ағымдық ағытып жөндеу пункті бар. Жалпы кепілдік иіні 2578 шақырымды құрайды. Өткен жылдың он екі айлық көрсеткіші бойынша Арыс вагон пайдалану депосы 76145 пойызды қабылдап-өткізген. Ағымдық ағытып жөндеу пункттерінен 5140 вагон жөнделіп шықты.
Соңғы жылдары депоның вагон қараушылары ақаулы вагондарды анықтап, апаттың алдын алуға зор үлес қосып келеді. Еске сала кетсек, қазіргі кезде өткен жылдың 1 қарашасынан басталып, осы жылдың 1 наурызына дейін жалғасатын «Бүйір рамаларын бақылау» айлығы өтіп жатыр. Осы айлық барысында ерекше көзге түскен вагоншылар аз емес.