Семейде Мәжіліс депутаты референдум бойынша үгіт-насихат жүргізді
Шығыс Қазақстан облысы бойынша меншікті тілші, Семей
Теміржолшылар қауымы еліміздің саяси-қоғамдық өміріндегі барлық шараларға бір кісідей атсалысып келеді. Мемлекет дамуы жолындағы саяси-идеологиялық мәні бар жұмыстарда әрқашан белсенді.
Жуырда шығыстағы теміржолшылар шаһары, машинистер ұстаханасы атанған Аягөз қаласына Қазақстан Республикасы Парламенті Мәжілісінің Экономикалық реформа және өңірлік даму комитетінің мүшесі Әмірхан Рахымжанов арнайы іссапармен келді. Жұмыс сапары барысында мәртебелі мейман жергілікті «Қамқор Локо- мотив» ЖШС «Аягөз локомотив жөндеу депосы» филиалы ұжымымен жүздесіп, алдағы 5 маусымда өткізілетін референдум мәселелері бойынша пікірлесу алаңын өткізуге мұрындық болды.
Онда еліміздің саяси өмірінде зор маңызға ие болып отырған жалпыхалықтық референдум жайлы пікір білдірген Әмірхан Мұратбекұлы осы науқанға теміржолшылардың да бір кісідей қатысып, дауыс беруі керектігі жөнінде сөз қозғады. «Еліміздің Ата Заңына өзгерістер енгізуге бейжай қарамайтын әр қазақстандықтың бұл азаматтық борышы, сондықтан өз таңдауымыз өз қолымызда екенін ұмытпайық, халайық» деді депутат. Жергілікті теміржолшылар қауымы Президент бастамасымен қолға алынған іргелі шарадан қалыс қалмайтындарын, бір кісідей қолдау білдіретіндіктерін жеткізді және өзгерістер енгізілетін баптарға қатысты сауалдарын қойып, өзара пікір алмасты.
Жалпы, білікті теміржолшы Асқат Тілеубаев басшылық жасайтын, ТЭ33А сериялы тепловоздарға сервистік қызмет көрсететін аталмыш мекеме қызметкерлері Аягөз өңірі бойынша барлық қоғамдық шараларда белсенділік танытып, алда келе жатыр. Атап айтсақ, қайырымдылық акцияларын ұйымдастыру, қала көшелерін абаттандыруға қатысу, спорт сайыстарына демеушілік жасау сынды маңызды істерде алдыңғы орыннан табылатынын айта кету ләзім.