Семей ЖТ бөлімшесінде заңдылықты сақтау мәселесі талқыланды
Абай облысы бойынша меншікті тілші
Жуырда Семей ЖТ бөлімшесінде теміржол саласымен әріптестік байланыс орнатқан кәсіпкерлердің басын қосқан жиын болып өтті. Кездесуге Семей қаласының көлік прокуратурасы, кәсіпкерлер палатасының қалалық филиалы өкілдері және бөлімше басшылығы мен теміржол арқылы жүк жөнелтушілер қауымы қатысты.
Жиынның мақсаты заңсыз тексерулер жүргізудің алдын алу, сонымен қатар, жең ұшынан жалғасқан сыбайластыққа жол бермеу болды. Семей ЖТ бөлімшесі басшысының логистика бойынша орынбасары Болат Өтегенов қазіргі таңдағы әріптестік аясындағы атқарылып жатқан шаралар жайында қысқаша ақпараттандырып өтіп, қалыптасқан ахуалға тоқталды.
– Бүгінде барлық жұмыстар заң аясында атқарылуда. Өрескел заңбұзушылықтарға жол берілген жоқ. Бұл орайда бөлімшедегі жүк станцияларының цифрлы байланыс тәсілдеріне көшуі де оң нәтиже беруде, – деді.
Ал, көлік прокуратурасының қызметкерлері егерде заңбұзушылықтар орын алатын болса, тексерілетін субъекті Семей қаласының көлік прокуратурасының мобильді тобына жүгіне алатындығын жеткізді.
Жиын барысында теміржол көлігімен жүк тасымалдау шараларына қатысты бірқатар түйткілді мәселелер талқыланып, мемлекеттік органдардың кәсіпкерлік субъектілеріне тексеру жүргізу тәртібі түсіндірілді.
Сондай-ақ, қадағалау органының өкілдері кездесуге қатысушыларға кәсіпкерлердің құқықтарын қорғау мақсатында Семей қаласының көлік прокуратурасы Құқықтық статистика комитетінің облыстық көлік басқармасымен бірлесіп, кәсіпкерлерді заңсыз түрде тексеру және осынау келеңсіздіктердің алдын алу мақсатында да арнайы жұмыс жүргізіп жатқанын да айтып өтті.
Сонымен қатар, Семей қаласының көлік прокуратурасы Кәсіпкерлердің құқықтарын қорғау жөніндегі мобильді топтың жұмысы жолға қойылғанынан хабардар етіп, байланыс тәртібін де түсіндіріп өтті.
Жиын барысында қатысушылар тарапынан бірқатар сауалдар да қойылып, оларға заң талаптары аясындағы жауаптар берілді.
Сөз орайында тоқтала кетсек, бүгінгі таңда Семей ЖТ бөлімшесі жүк тасымалы бойынша көптеген ірі кәсіпорындар мен орта бизнес өкілдеріне тұрақты қызмет көрсетеді. Бұл орайда жүк жөнелтуге тапсырыс берушілер саны жылдан-жылға артып келе жатқаны байқалады. Яғни, аталмыш бағыттағы іс-шаралардың заңдылығын сақтау, заңсыз тексеру, жемқорлық сынды әрекеттерге жол бермеу бойынша жүргізілетін жұмыс- тарға басымдық берілуде.