Орман өрті Ауыл станциясына жақын маңда өшірілді
Абай облысы бойынша меншікті тілші
Ресеймен шекаралас аймақта тіркелген дала өрті онымен шекаралас аймақтарға да әсерін тигізіп отыр. Өрт көрші елмен шекаралас жатқан Семей бөлімшесінің Ауыл станциясына небәрі 7 шақырым қалғанда ауыздықталды.
Тілсіз жауды ауыздықтауға атсалысқан темір жолдың Өрт сөндіру пойызы осы өңірде қызыл жалынмен күрес жүргізіп жатқан Төтенше жағдайлар департаментінің 20-дан астам өрт сөндіру машинасын сумен қамтамасыз етті.
Айта кетер жайт, дала өрті пойыздар қозғалысына әсер еткен жоқ және теміржол инфрақұрылымы нысандарына төнген қауіп сейілді. Эвакуацияланған тұрғындар арасында теміржолшылар қауымы жоқ. Сонымен қатар Семей және Защита станцияларында қауіпсіздік мәселелері бойынша жедел штабтар құрылды. Қауіп күшейер болса, жоспарға сай жұмыстар жүргізілетін болады.
– Қазіргі таңда өрт орын алған аумақта төтенше жағдайлар қызметімен қатар ішкі істер саласының қызметкерлері, әскерилер де жұмылдырылуда. Сондай-ақ еріктілер де жәрдемдесуде. Астана қаласы, Павлодар мен Қарағанды облыстарынан арнайы техникалар мен қосымша күш келіп жетті. Теміржолшылар тарапынан өрт сөндіру пойызы көмекке жіберілді. Тілсіз жаумен күрес жүргізіліп жатқан аумақтан сәт сайын хабар алып отырмыз. Жағдай толық бақылауда. Станциялар мен жол айрықтарына төніп тұрған қауіп жоқ. Қызыл жалынды оқшаулау және жою үшін барлық қажетті шаралар қабылдануда, – дейді НЖС-6 бөлімшесі бойынша азаматтық қорғаныс бөлімінің инженер-технологы Еркін Спанов.
Қызыл жалынды сөндіруге аңызақ жел де кедергі келтіруде екен. Соның себебінен 3 мыңнан астам гектар жер өртеніп кеткен. Оқиға орнына ҚР ТЖМ вице-министрі арнайы келіп, жағдайды көзімен көріп қайтты.