Қызылорда станциясы жоспарды артығымен орындап келеді

Қызылорда станциясы – өндірісі ауқымды, соған сай жұмыс көрсеткіштері әрқашан жоғары, аймақтың жүгін көтеріп тұрған негізгі станцияның бірінен саналады. Әрине, көрсеткіштердің асыра орындалуы теміржол көлігін пайдаланушылардың саны мен тасымалдағы жүк көлемінің артуымен қатар, жүк операциялары сапалы атқарылып, құжаттардың кәсіби деңгейде рәсімделуіне де байланысты екені анық.

Станция ұжымы биылғы жылды да табысты қорытындылауға мүдделі, оған барлық алғышарт бар көрінеді. Бірінші жартыжылдықта, мәселен 762 вагонға жүк тиеу межесі 1651 вагонға жеткізіліп, жоспар 216,67 пайызға орындалса, 49969 тонна жүк тиеу жоспары 107872 тоннаға жеткізіліп, 215,88 пайызға асыра орындалған. Осылайша, өндірістік жұмыс көрсеткіштері 101,07-216,67 пайыз аралығында орындалып, көш басынан көрінген станциялықтар бүгін де сол деңгейден төмендеген жоқ. Мұның бәрі бекеттегі теміржолшылардың кәсібилікке негізделген еңбегі, күнделікті тапсырмалардың шебер ұйымдастыра білуінің нәтижесі болса керек.  

– Әр ауысым сайын күнделікті атқарылған өндірістік жұмыстардың есебі тыңдалып, атқарылатын жұмыстарға сараптама жасалады. Станцияда еңбек ететін теміржолшылардың дені он-он бес жыл тәжірибесі бар кәсіби мамандар. Сондықтан әрқайсысы өздеріне бекітілген жұмыстардың жауаптылығын терең сезініп, кемшіліксіз жұмыс жасауға тырысады. Біздер осы жұмыстардың уақытылы, талапқа сай орындалуын қадағалап отырамыз. Күнделікті бақылау мен кәсіби жауапкершілік нәтижесінде өз міндетіміздегі жұмыстарды асыра орындауға мүмкіндік алып отырмыз, – дейді Қызылорда станциясының бастығы Қайрат Жанкелдіұлы.  

Жалпы, Қызылорда станциясы ежелден аймақ теміржолы үшін кадрлар ұстаханасы ретінде танылған. Себебі жан-жақтағы ірілі-ұсақты станцияларды басқаруға Қызылордада еңбек етіп, тәжірибе жинаған теміржолшыларды тағайындау үрдісі болған көрінеді. Қазіргі таңда басты бекетті тәжірибелі теміржолшы, өз ісінің шебері Қайрат Төрединов басқарып, барлық жұмыстардың ретімен атқарылуын ұйымдастырып келеді. Бүгін де станциядағы бірқалыпты жұмыс ырғағы, бекеттегі қым-қиғаш қозғалысты реттеп отырған кезекшілер мен пойыз құрастырушылардың шапшаң қимылы, жүк қабылдап тапсырушылардың, тауар кассирлерінің ширақ та сауатты іс-қимылына куә болып, аймақтағы облыстық деңгейдегі басты бекеттің тірлігіне еріксіз тәнті болып аттандық.