Семейде «Вокзалдағы қабылдау» акциясы өтті
Абай облысы бойынша меншікті тілші
Жуырда теміржол көлігін пайдаланатын жолаушы азаматтарға құқықтық және кеңес беру түріндегі көмек көрсету мақсатында Семей, Аягөз, Шар теміржол вокзалдарында Семей станциясы желілік полиция бөлімінің қызметкерлері жергілікті теміржолшылармен бірлесіп «Вокзалдағы қабылдау» атты ерекше акция өткізді.
Аталмыш іс-шараға Семей станциясындағы желілік полиция бөлімінің бастығы полиция подполковнигі Ж.Ибраев, бөлім бастығының бірінші орынбасары полиция полковнигі Қуаныш Балтақаев, көші-қон және әкімшілік полиция қызметкерлері де арнайы келіп қатысты.
Кездесу барысында вокзалдардағы жолаушылар өздерін қызықтыратын кез келген сұрақты қойды. Барлық сауалға Қазақстан Республикасының заңнамаларына сәйкес толыққанды жауап берілді. Сондай-ақ азаматтарды толғандыратын өзге де көптеген мәселер бойынша білікті түрде заңдық көмек те көрсетілді.
– Көліктегі қоғамдық тәртіп пен жолаушылар құқығының қорғалуы қашанда басты назарда. Ал осынау республикалық акция барысында азаматтар аталмыш бағыттағы шаралар жайлы түсінік алып, өзекті сауалдарға жауап тапты, – дейді бұл орайда Семей станциясындағы желілік полицияның әкімшілік полиция бөлімінің бастығы полиция капитаны Рүстем Әбеуов.
Осынау акцияны өткізу кезеңінде әкімшілік полиция қызметкерлерімен қоғамдық еріктілер азаматтарға заңгерлік көмек көрсету үшін желілік полиция және Абай көлік прокурорының «жедел желі» телефондарының номері көрсетілген буклеттер, ескертпе парақшалар таратты.