Аягөздік теміржолшы болат жолда жұмыс істейтін әріптестерінің жұмысы жайлы бейнебаян түсірді
Абай облысы бойынша меншікті тілші
«Ел іші – өнер кеніші» деген рас. Аягөз локомотив пайдалану депосында Жанарбек Бейсембин есімді әнші жігіт бар. Тепловоз машинисінің көмекшісі болып еңбек ететін оның есімі бүгінде республика теміржолшыларына танымал болып келеді.
Ол биыл үлкен сахнада алғаш рет өнер көрсетті. Астанада өткен кәсіби мерекеде ұлттық компания басшылары мен теміржолшылар алдында «Машинист маршы» әнін орындап қошеметке кенелді.
– Әннің шығуына себеп болған, ақыл-кеңес берген идея авторы Аягөз локомотив пайдалану депосының директоры Алмас Жанатқалиұлы еді. Сөзін жазған танымал аягөздік айтыскер ақын Қазыбек Байжұманов, әуенін шығарған семейлік Қуаныш Садықов атты сазгер. Ал студияда әрлеген Аягөздегі музыкант Марат Садуақасов. Сиясы кеппеген су жаңа әнді сахнаға алғаш шығару оңай дүние емес екен. Алғашқы әнім мен бейнебаяным үлкен тәжірибе болды, – дейді Жанарбек Нұртайұлы.
Қазіргі күні Жанарбек шығармашылық ізденіс үстінде, үлкен еңбек жасауда. Тәуелсіздік мерекесіне орай аягөздік ақын Қазыбек Байжұмановтың сөзіне жазылған «Қазақстан теміржолы» атты жаңа әннің тұсауы кесілмек. Ән желтоқсанның 15-і күні өтетін мерекелік салтанатты кеште шырқалатын болады.
Жанарбек осы әнге бейнебаян түсіріп, жақында ғана таспаға жазыпты.
Бар болғаны 3,5 минутқа сыйдырылған әсерлі туындыға негізінен аягөздік теміржолшылардың жұмысын арқау еткен. Яғни ТЧЭ25, ПЧ-42, ШЧ-30 және Аягөз станциясы теміржолшылары – бейнебаянның басты кейіпкерлері. Қазақстандық патриотизмге негізделген туынды сала қызметкерлерінің жауапты да өзіндік ауыртпашылығы бар еңбегінен мол хабар береді. Әсіресе түп негізі Түрксіб құрылысынан бастау алатын жол шаруашылығына басымдық беріпті.
– Талантты музыкант Серік Жұмабеков пен «Аягөз» студиясына алғысым шексіз. Бұл әніміз де халықтың көңілінен шығады деген үміттемін. Бейнебаян түсіруге қаржылай жәрдем жасап, көмек қолын созған теміржолшыларға, әсіресе өз ұжымыма зор рахметімді айтамын, – дейді аягөздік өнерпаз машинист көмекшісі.
– Жанарбек – ұжымдағы беделді жастардың бірі. «Жігітке жеті өнер де аз» демекші, негізгі жұмысынан бөлек, спорттық сайыстарда да ерекше белсенді. Ұжымдағы түрлі мерекелік іс-шараларды, концерттік бағдарламалар жүргізеді, – дейді жас маман жайлы пікір білдірген ТЧЭ-25 басшысы Алмас Жанатқалиұлы.
Жас әншінің шығармашылық жоспары ауқымды. Талабын шыңдап, өнерін дамыта түсуді де көздеп отыр. Бұл орайда басшылық тарапынан да қолдау бар.
