Қызылордалық теміржолшыларға ұжымдық шарт таныстырылды (Фото)
Қызылорда облысы бойынша меншікті тілші
Қызылорда магистральдық желі бөлімшесіне қарасты Қызылорда жол дистанциясының активінен құралған жұмысшы топ жолшылар ұжымын аралап, 2024-2026 жылдарға арналып қабылданған Ұжымдық шартпен таныстыруда.
Теміржолшылардың еңбек және әлеуметтік қатынастарын құқықтық тұрғыдан реттейтін басты құжат саналатын Ұжымдық шартқа жаңадан қосылған баптар, өзгерістер түсіндіріліп, осыған орай жұмыскерлердің сауалдарына жауап берілді.
Құрамында Марат Оңалов басқаратын жол дистанциясының бас инженері Ақылбек Әбілдаев, еңбекті қорғау инженері Майра Бадырақова, өндірістік оқыту шебері Ербол Сарсенбаев, кадр бөлімінің басшысы Зауре Алматова мен кәсіподақ ұйымының төрайымы Ғалия Ноғайбаева бар жұмысшы топ Шорнақ, Талап, Сауран, Жаңақорған, Жалағаш, Тереңөзек және Қараөзек станцияларына барып, телімдегі жұмысшылармен кездесу өткізді.
– Жыл басында 2024-2026 жылдарға арналып қабылданған Ұжымдық шартқа теміржолшылардың әлеуметтік және еңбек мәселесін қорғауды жетілдіре түсу мақсатында бірнеше жаңа пункт енгізілген. Жолшыларға сол өзгерістердің бәрі теміржолшылар игілігі үшін, олардың әлеуметтік әлеуетін арттыруға бағытталғанын түсіндіріп, әріптестерімізбен пікір алмасып, ойларын тыңдадық. Және де қаңтар айында мерейлі 50-60 жасқа толатын жол жөндеушілер Мырзалы Ақынбай, Тұрсынбек Рақымбаев пен Тұрғанбек Абдуалиевті дистанция басшылығы мен кәсіподақ ұйымы атынан құттықтап, бағалы сыйлықтар тапсырдық, – дейді кәсіподақ ұйымының төрайымы Ғалия Ноғайбаева.
