Шалғайдағы станцияларда теміржорлшылардың демалыс үйлері жаңарып жатыр

Шалғай станциялардағы теміржолшылардың әлеуметтік ахуалы, олар үшін қолайлы еңбек ортасын қалыптастыру – бірінші кезектегі мәселе. Бұл орайда шығыстағы сала қызметкерлері үшін әсіресе өткен жыл айтарлықтай игіліктер әкелді.

Желі бойындағы жолшылар қосынын қайта жабдықтау, жылыну үйшіктерін талапқа сай ету және локомотив бригадалары үшін санитарлық-тұрмыстық жағдайды жақсарту мақсатында елеулі жұмыс жасалды. Мәселен, Шар, Дегелең, Риддер, Күмістау, Алтай сынды шалғайдағы станциялардағы локомотив бригадаларының демалыс үйлерін ағымдағы жөндеуден өткізу үшін жалпы көлемі 72 700,31 мың теңге бөлініп, толықтай игеріліпті. Соның нәтижесі болар, биылғы қатал қыста локомотив бригадалары тарапынан ешқандай шағым түспеген.  

– Ұлттық компания басшылығының назарға алуымен ТД-17 Шар айналым депосында орналасқан демалыс үйі бұрын-соңды болмаған деңгейде қайта жаңарды. Аягөздегі ТЧЭ-25 мекемесінің бас ғимаратында заманауи спорт залы ашылғаны да игілікті іс болды. Салауатты өмір салтын ұстанған теміржолшылар бос уақыттарын сонда өткізуде, – дейді бұл орайда Аягөз локомотив пайдалану депосының машинист көмекшісі Жанарбек Бейсембин.  

Ал НЖС-6-ға қарасты шаруашылықтар бойынша жайлы еңбек ортасын қалыптастыру ешқашан күн тақырыбынан түскен емес. Мәселен, ПЧ-42, ПЧ-40, ПЧ-39 мекемелері бойынша жолшыларға арналған барлық жылыну пункттері толыққанды жөндеуден өткізіліп, жаңартылған. Сонымен қатар Жаңа-Семей-Дегелең бағытындағы бірқатар станцияларда жолшылар үшін жаңадан модульдар пайдалануға берілген. Биылғы жылға да ауқымды жоспар бар.  

Жалпы, сала еңбеккерлері бүгінгі таңда теміржол саласында жасалып жатқан игілікті істерге разы, жалақы жыл сайын аз-аздан болса да көтеріліп келеді, уақытында төленеді, ал жаңадан қабылданған ұжымдық шартта теміржолшылардың әлеуметтік ахуалына баса назар аударылып отырғаны да көңілден шығады. Теміржолшылардың сөзі, өтініш-тілегі мекеме басшыларына дер кезінде жетеді. Яғни желі бойындағы қарапайым жолшылардан бастап кеңседегі қызметкерлерге дейін бөлімше директорының WatsApp номеріне тікелей хат-хабар жазып, арыз-шағымын айта алады. Өткен күзден бастап қолға алынған шара нәтижесіз емес. Сондықтан болар, соңғы уақытта еңбек даулары күрт азайып, мезі ететін түрлі тексерулер де саябырлаған.