Жолаушыларға сыйлық таратылды

Республика күні қарсаңында мерекеге орай 24 қазан күні «Қазкөліккәсіп» ҚБ кәсіподағы Атырау өкілдігінің ұйымдастыруымен Атырау вокзалы перронында №691 «Атырау – Ақтөбе» пойызының жолаушыларына дәм таратылып, сәт-сапар айтылды.

Атырау жүк тасымалы және магистральдық желі бөлімшелері, «Қазтеміртранс» АҚ Атырау филиалы кәсіподақ ұйымдары бірлесіп өткізген акция жолаушылардың көңілінен шықты. Перронда «Атамекен», «Менің Қазақстаным», басқа да ұлттық патриотты әндер ойнатылып, НЖС кәсіподақ төрағасы Марат Бисенғалиев жолаушыларды дауысзорайтқыш арқылы Республика күнімен құттықтады. Сыртында «Қазкөліккәсіп», 25 қазан – Республика күні деп жазылған кішкене қорапқа құрт пен жент, бауырсақ, құрма, «Қазақстан» шоколады салынған. Сондай-ақ жолаушыларға бәліш, тәтті тоқаш, басқа да дәмдер ұсынылды. Пойызға мінуге асыққан жолаушылар дәмнен ауыз тиіп, қолына бір қорап сыйлығын алып, рахметін жаудырды. Музыка әуеніне билеп, қосыла ән айтқан жолаушылар мәз-мейрам болысты. Жолсеріктер де дәмнен құралақан қалмады, оларға да, вагонға отырған жолаушыларға да кәсіподақ қызметкерлері вагон ішін аралап, дәмнен үлестірді.