Құлсары станциясында балық аулау жарысы өтті
Атырау облысы бойынша меншікті тілші
«Қазкөліккәсіп» ҚБ Атырау өңірі бойынша өкілдігінің ұйымдастыруымен Құлсары станциясында дәстүрлі мұз астынан балық аулау жарысы өтті.
Жарысқа Құлсары станциясынан және сол жерде шоғырланған ПЧ, ШЧ, ВЖДО, ВЧД, ЭЧ, ТЧЭ-4 сынды теміржол кәсіпорындарынан жасақталған командалар қатысты. Алдын ала келісім бойынша 3 қызметкер және 1 зейнеткерден құралған команда мүшелерінің бәрі әрине қысы-жазы демалысын көл басында өткізетін әуесқой балықшылар екен. Жарыс «ең бірінші балық ұстаушы», «ең көп балық ұстаушы», «ең үлкен балық ұстаушы», «ең тәжірибелі» және «ең жас балықшы» номинациялары бойынша өтіп, қорытындысында оларға бағалы сыйлықтар табыс етілді. Қалған балықшылар да құр қайтпай, ынталандыру сыйлықтарына ие болды. Қыс ауасы балықшылар тоңып қалмасын деп кәсіподақ ыстық ас та ұйымдастырды.
Демалыстарын таза ауада көңілді өткізіп, суға қармақ салып, балық аулаған құлсарылық теміржолшылар үшін бұл бір сәтті күн болды. Осындай жақсы демалысты ұйымдастырған кәсіподақ ұйымына алғыстарын жаудырып, риза болып тарқасты.