Теміржолшылар балық аулап жарысты
Атырау облысы бойынша меншікті тілші
«Алабұға, ақ балық, қармағымды қап, балық» дегендей, ақпан айының алғашқы демалыс күнінде аймақ теміржолшылары бас қосып, балық аулауға тағы да Ақжайыққа аттанды.
«Қазкөліккәсіп» Орталық кеңесінің Атырау өңірі бойынша өкілдігінің ұйымдастыруымен мұз астынан балық аулаудан жарысы өтті. Өкілдік төрағасы Боранбай Қамиевтің айтуынша, жарысқа барлық теміржол мекемелерінен 2 адамнан, қалаға жақын орналасқан станциялардан 1 адамнан қатысуға шешім алынған. Бұл жолы да жарыс бес номинация бойынша: ең бірінші балық ұстаушы, ең көп балық ұстаушы, ең үлкен балық ұстаушы, ең тәжірибелі және ең жас балықшы номинациялары бойынша өтіп, жеңімпаздарға дипломдар мен сыйлықтар беріліп, қалған қатысушыларға ынталандыру сыйлықтары табысталды.
Жарыс өте жоғары деңгейде, таза ауада әдемі әзіл, ойын-күлкімен, ең бастысы көтеріңкі көңіл-күймен өтті. Теміржолшылар қармағына іліккен шабақ балықтарды бір-біріне сыйлап, бір-біріне көмек көрсетіп, әңгіме-дүкен құрып жақсы демалыс өткізді. «И», бұл біз үшін бір жақсы демалыс күні болды. Ашық аспан астында күнде кездесе бермейтін әріптестермен бас құрап, Жайыққа қармақ салып, балық ұстау рахатына бөлендік. Қатысушылардың қай-қайсысы да риза болды деп ойлаймын. Бізге үнемі жақсы шараларымен көңіл бөліп отыратын кәсіподаққа рахмет айтамыз» дейді жарысқа қатысушылардың бірі, Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиев.
