Үздіктер қатарында
Қызылорда облысы бойынша меншікті тілші
Қызылорда қаласындағы ірілі-ұсақты еңбек ұжымдарының арасында өткен «Аманат» партиясы- ның қалалық деңгейдегі сайысында Қызылорда магистральдық желі бөлімшесінің «Магистральды желі» бастауыш партия ұйымы үздіктер қатарынан табылып, жүлделі үшінші орынды иеленді.
Үздік ұйымды арнайы құттықтап, марапаттарын табыс ету үшін бөлімшеге арнайы келген партиялықтар теміржолшылардың партиялық жұмысқа белсенді қатысуын қоғам игілігі үшін қызмет етудің үлгісі деп бағалады.
«Aманат» партиясының Қызылорда қалалық филиалының атқарушы хатшысы Гүлшат Мұсаева бастауыш партия ұйымының мүшелерін «Үздік бастауыш партия ұйымы» сайысының қалалық кезеңінде жүлделі III орын алуымен құттықтап, партиялық жобаларды тиімді іске асырып келе жатқан теміржолшыларға алғыс айтты.
Бөлімшедегі бастауыш партия ұйымының төрағасы Ербол Сәулебеков алдағы уақытта да аманаттықтар қатарында қоғамдағы өзекті мәселелердің оң шешімін табуына атсалысып, қолдау білдіретіндерін жеткізді.