Көктемгі тексеріс басталды

Атырау жүк тасымалы бөлімшесінде 14 сәуірден көктемгі комиссиялық байқау басталды. Оның барысында қозғалыс қауіпсіздігін сақтау, еңбек қорғау және қауіпсіздік техникасы, техникалық құралдардың, ғимараттардың жай-күйі, т.б түгел сүзгіден өтеді.

Сондай-ақ теміршолшылардың білім мен біліктілігі, жеке мәселелері, проблемалары да қаралады.  

«Комиссия мамандарымен қамтылған тексеріс арнайы локомотив арқылы жүзеге асырылмақ. Алғашқы екі күн қала басындағы станциялар мен ВЧДЭ-1, ТЧЭ-1, ШЧ-8, ПЧ-9, ЭЧ-4, вокзал, отын қоймасы нысандары қаралып, содан кейін Д.Нұрпейсова, Ганюшкино, Исатай станцияларындағы барлық мекемелер жұмысы қаралады. 21-22 күндері қаладағы нысандар, сонан соң Сағыз – Мақат, Мақат – Құлсары телімдері бойынша басталып, Махамбет, Атырау, Ақжайық, Теңдік станциялары, телімдердегі жол, сигнализация, энергиямен қамту дистанциялары, вагон, локомотив деполары, т.б. нысандар қаралады. Сол жерлерде талқылау жұмыстары да жүргізіледі», – дейді техникалық бөлім бастығы Әзиз Айжарықов.

Бөлімше бойынша биылғы жылдың алғашқы тоқсанында пойыз және маневрлік жұмыстарда өндірістік жарақат алу болмаған. Пайдаланым көрсеткіштерін орындау бойынша нәтижелер жақсы деңгейде келе жатыр. Бұған дейін құрылымдық бөлімдердің өз ішінде көктемгі тексеруге дайындық деңгейі, пойыздық және маневрлік жұмыстарда ақау, өндірістік жарақат алу жағдайы, қозғалыс қауіпсіздігі, еңбек қорғау және қауіпсіздік техникасы, техниикалық құралдардың жағдайы, ғимараттардың жай-күйі, абаттандырылуы, жұмысшылардың тәртібі қаралған. Ол тексерулерде байқалған кемшіліктер арнайы комиссиямен осы айдың 14-не дейін қаралады. Сосын мамыр айының ортасына қарай жалпы қорытынды жиын өтпек.