Маңғыстаулық теміржолшылар байқаудың бас жүлдесін алды
Маңғыстау облысы бойынша меншікті тілші
Қозғалыс қауіпсіздігі мәдениеті аясында Астанада өткен байқауда маңғыстаулық теміржолшылар жүлделі бірінші орынды жеңіп алды. «Үздік тәжірибелер» атты сайысқа 12 команда қатысқан еді.
Бірінші орынның жүлдесін еншілеген түбек командасы 750 мың теңгенің сертификатына ие болды. Байқауда екінші орын Ақтөбе, үшінші орын Ақмола бөлімшесінің командаларына бұйырды. Байқаудың негізгі мақсаты – қозғалыс қауіпсіздігі саласында бір бөлімшеде болып жатқан соны жаңалық, мықты жобаны өзге бөлімшелерге таныстырып, іске асыруға, тәжірибе алмасуға ықпал ету болатын. Мағыстаудан бұл сайысқа локомотив, вагон, жол шаруашылықтары мен қозғалысты ұйымдастыру және басқару салаларынан кіл мықтылар сайланып кеткен. Байқау шарттарына сай барлық сынақтан сүрінбей өткен олар сайыс барысында мол тәжірибе жинап, қозғалыс қауіпсіздігі бағытында Маңғыстауда қолдануға болатын жобаларды да түйіп қайтқандарын айтады.
Бес адамнан құралған команданы Маңғыстау ЖТ қозғалыс қауіпсіздігі бөлімінің бастығы Сұлтанмұрат Тұрғанбаев басқарып, топ құрамында Бейнеу айналым депосының машинист нұсқаушысы, Бейнеу жол дистанциясы бастығының орынбасары, Маңғыстау магистральдық желі бөлімшесінің қозғалыс бөлімі мен вагон депосынан жетекші инженер-технолог мамандар бар.
– Бірінші күні әр команда өз аймағында қозғалыс қауіпсіздігін сақтау бағытында іске асырылған жобалар жөнінде презентация жасады. Екінші күні тренингке қатысып, үшінші күні сайыстың басында берілген үй тапсырмасын орындадық. Бұрын болған қозғалыс қауіпсіздігінің бұзылу жағдайы дерегі бойынша тергеу жүргіздік. Жағдайдың себеп-салдарын талдадық. Қайталамау жолдарын қарастырдық. Интеллектуалдық ойындарға да қатысып, өзімізді жан-жақты сынап көрдік. Біз ол жерде бір-бірінен асып түсетін өте мықты жобаларды көрдік. Біз де өз саламызға қатысы бар, қажет болады деген жобалармен жақынырақ таныстық. Оны жасаған мамандармен ақылдасып, ой бөлісіп, жалпы, қай облыстағы теміржол мекемелерінде қандай жобалар жүзеге асырылып жатыр, оның тиімді тұстары неде, нәтижесі қалай, бәріне қанықтық. Берері мол байқау болды, – дейді Бейнеу айналым депосының машинист нұсқаушысы Рамиль Құттымұратов.