Құйрық-бауыр асатудан «тыштыма» жегізуге дейін...

Биылғы Наруыз мерекесі семейлік теміржолшылар үшін жылдағыдан өзгерек өтті. Басты себеп – «ҚТЖ» ҰК» АҚ бойынша «Наурыз мейрамын» мерекелеу концепциясы аясында мейлінше тартымды әрі тағылымды түрде өткізуде. Мәселен, халқымыз үшін қастерлі саналатын Ораза айт мерекесі күнінде бөлімшеде ұлттық салт-дәстүрді ұлықтайтын келелі іс-шара өтті.  

Таңертең ертелеп бөлімшенің кең дәлізінде наурызбен айтқа ортақ ақ дастархан жайылды. Бұл игілікті жайт алдағы жылдары тұрақты дәстүрге айналмақ.

Десек те, осынау күнгі ерекше шара НЖС-6 бөлімшесі мен НОД-ЖТ бөлімдері бірлесіп ұйымдастырған қазақы дәстүрден көріністер болды.  

Құрметті теміржолшы, ақсақал Қырықбай Әлсейітұлы, бөлімше басшысы Алмас Сейсемқанов пен Семей магистральдық желі бөлімшесі директоры Айдын Шәукежанов және «Қазтеміржолкөлік» ҚБ Семей өңірі бойынша өкілі Есен Қажығұловтар құттықтау лебіздерін білдірді.  

Сөз алған Айдын Мақсұтбекұлы баршаны құттықтай келе, биылғы наурыз мерекесі жергілікті теміржолшылар үшін жағымды жаңалығымен келгенін жеткізді. Жүк тасымалы, қозғалыс қауіпсіздігін сақтаудағы жетістіктерден бөлек, биыл Семей қаласында теміржолшылар үшін жаңа баспана салынатынын айта келе, жақсы жаңалықтардың көп болуына тілектестік білдіріп өтті.

Осыдан соң арнайы сахналық киімдер тіктіріп, зор даярлықпен келген түрлі бөлімдер мамандарының ұлттық сипаттағы театрландырылған қойылымдарына кезек берілді. Алғашқы болып, көпшілік алдына шыққан НЖС-6 бөлімінің қыз-жігіттері қазақ халқының көнеден жеткен «Шашбау тағу» дәстүрін сахналап берді. Ал, бөлімшенің еңбекті қорғау бөлімі мамандары «Байғазы беру» салтының көпшілік біле бермейтін қыр-сырын ашықтап берді. Ал, бөлімшенің төртінші ғимаратында отыратын кеңсе қызметкерлері бірігіп «Сырға салу» бойынша көрініс көрсетіп, төл дәстүріміздің ұмытылып бара жатқан үлгілерін насихаттады.  

Деседе, Семей вокзалының ұжымы көрсеткен «Қыз ұзату» көрінісі ерекше әсерлі шықты. Бас құда болып құдалар тобын бастап келген бөлімше бастығының вокзал шаруашылығы бойынша орынбасары Нұрлан Жақсылықұлы да өз образын шебер сомдап, бұл ұлттық рәсімнен мол тәжірибесі бар екенін көрсетіп берді. Бұл ретте сыңсу айтудан бастап, құдаларға құйрық-бауыр асату, арқан керу, ырым-сырым, өлі-тірі сынды ел шығысына тән салт-жоралғылар қаз-қалпында көрсетілді.

Сол тәрізді НОД-ЖТ бөлімшесінің Жүк тасымалы бөлімі «Құда түсу», техникалық қызмет көсету мамандары «Шілдехана», Әкімшілік-шаруашылық бөлімі «Тұсау кесу», ал Қаржы блогы қызметкерлері ұлтымыздың «Бесікке бөлеу» игілікті дәстүрін тамаша сомдап шықты. Бесіктің әрбір бөлшегін жіліктеп түсіндіріп, үкі мен шүмекті не үшін әрі қалай тағу керектігін де тәптіштеп шыққан теміржолшылар аңтарылып тамашалап тұрған жастар қауымына «тыштыма» жегізіп те жіберді.

– Бұл байқау емес. Салт-дәстүрді ұлықтап, ұлттық құндылықтарды жас буын арасында дәріптеу. Жаһандану заманында бабаларымыздан қалған таным мен мәдениетті қайта жаңғырту аса қажет дүние, – дейді шараның негізгі ұйымдастырушысы «Қазтеміржолкәсіп» ҚБ Семей өңірі бойынша өкілі Есен Асқарұлы.

Айта кетсек, шығыстағы теміржолшылар арасында Наурызнама онкүндігі қызу түрде жалғасын тапты. Спорттық шаралар мен 22 наурыз күні Теміржолшылар алаңында кең көлемде Наурыз думаны ұйымдастырылды.