Күзет қызметі кепілдік береді
Абай облысы бойынша меншікті тілші
Қозғалыс қауіпсіздігімен қатар тасымалданатын жүктердің бүтіндігі мен сақталуы да – маңызды мәселенің бірі. Әсіресе, ашық вагондардағы бағалы тауарлардың діттеген жеріне қаз-қалпында жетуі – күзет қызметінің басты міндеті.
«ӘТЖК» ЖШС Семей филиалының қызметкерлері осы орайда заманауи құрал-жабдықтарды пайдалану, тың әдіс-тәсілдерді қолдану арқылы клиенттер тапсырысының сақталуына кепіл болуда. Мәселен, жуырда бөлімшеге қарасты «Жарма-Аягөз» телімі аралығында ірі көлемдегі қылмыстық істің алды алынып, тасымалдаған мүліктің қолды болуына жол берілмеді. Семей филиалының сарбаздары желілік полиция қызметкерлерімен бірлесіп, ауқымды операция жүргізді. Соның нәтижесінде жүк вагондарына тиелінген мыс концентраттарын үптеп жатқан ұйымдасқан қылмыстық топтың мүшелері ұрлық үстінде қолға түсті. Күзет қырандарының асқан қырағылығы мен шебер әрі үйлесімді қимылы нәтижесінде арам пиғылдылар қылмыстық әрекеттерін толыққанды жүзеге асырып үлгермеді. Ұсталған алты күдікті құқық қорғау органдары өкілдеріне тапсырылды.
Міне, осылайша Самат Райымбеков басқаратын әскерилендірілген күзет қызметкелерінің кәсібилігінің арқасында жүк тасымалындағы ауқымды шығынға жол берілген жоқ. Жалпы, филиал сарбаздары жөнелтілген жүктерді тек тепловоз терезесінен ғана бақылап қоймайды, арнайы жол талғамайтын көлікпен де бірге ілесіп жүреді. Сол тәрізді квадракоптер арқылы әуеден де бақылау жүргізіледі. Ал, секем алдырар жағдай туындай қалса, бірден арнайы операция жүзеге асырылады. Ал, жоғарыдағы ұсталғандардың айыбы мойындарына қойылып олардың үстінен қылмыстық іс қозғалып, сот процесі жүріп жатыр. Қазіргі таңда филиалдың «Өңіраралық шұғыл әрекет ету оңтайлы тобының» жеке құрамы жоспарлы жұмыстарды мейлінше күшейтуде. Семей теміржолының 1394 шақырымдық телімі сенімді қолда деуге толық негіз бар.