Шалқарда ҚТЖ мен Wabtec серіктестігі аясында жаңа өнер мектебі салынып жатыр
Ақтөбе облысы бойынша меншікті тілші
Шалқар қаласында жаңа өнер мектебінің құрылысы аяқталуға жақын. Жоба «Қазақстан темір жолы» ҰК» АҚ және Wabtec корпорациясының стратегиялық серіктестігі нәтижесінде салынып жатыр.
Ақтөбе облысы әкімінің орынбасары Асылбек Есенбаев теміржолшылармен бірге Шалқарды аралады. Вокзалды реконструкциялау жұмысымен танысып, теміржолшылардың қолдауымен салынып жатқан өнер мектебінің құрылысымен танысты.
Бүгінде Шалқар қаласында бірқатар әлеуметтік және инфрақұрылымдық нысандардағы құрылыс жұмыстары қарқынды жүріп жатыр. Жауапты мекемелер атқарылып жатқан жұмыстар мен нысандардың дайындық деңгейі туралы баяндады.
Теміржолшылардың әлеуметтік жауапкершілігі аясында жүзеге асып жатқан өнер мектебі балалардың шығармашылық әлеуетін дамытуға және өңірдің әлеуметтік инфрақұрылымын нығайтуға бағытталғаны айтылды. Құрылыс алаңында 50-ден астам маман мен 25 бірлік арнайы техника жұмыс істеуде. Қарқынды кезеңде жұмысшылар саны 150 адамға дейін артады. Жоба - теміржолшылардың өңірдің әлеуметтік дамуына қосқан маңызды үлесінің бірі.
«Жаңа өнер мектебі пайдалануға берілген соң 100-ге жуық жаңа жұмыс орны ашылады. Шалқар теміржол торабы қызметкерлерінің балалары мен аудан жастарына шығармашылық білім алуға қолайлы жағдай жасалады»,- деді А. Есенбаев.
Асылбек Есенбаев құрылыс жұмыстарының сапасына, қауіпсіздік талаптарының сақталуына және нысандарды белгіленген мерзімде пайдалануға беруге ерекше назар аударуды тапсырды. Сондай-ақ жауапты ұйымдарға барлық жұмысты бекітілген кестеге сәйкес сапалы әрі уақытылы аяқтаудың маңыздылығын атап өтті.