Нұрлыбек Нәлібаев Ақтөбедегі вокзалдың құрылысын тексерді
Ақтөбе облысы бойынша меншікті тілші
Ақтөбе теміржол вокзалының құрылысы мәреге жақындады. Нысанды қайта жаңғырту жұмыстары жоғары қарқынмен жүріп жатыр. Құрылыс дайындығы бүгінгі таңда 95 пайызды құрайды.
Осы аптада ҚР Премьер-министрінің бірінші орынбасары Нұрлыбек Нәлібаев Ақтөбе облысына жұмыс сапары кезінде вокзал құрылысын көруге барды. Жаңғырту жұмыстарының барысымен «ҚТЖ»ҰК» АҚ Басқарма төрағасының орынбасары Мұрат Төрегелдин таныстырды.
Қазір Ақтөбенің бас вокзалында ғимараттың ішкі әрлеу жұмыстары жүріп жатыр. Инженерлік жүйелер орнатылуда. Перрон мен вокзал маңын абаттандыру аяқталуға жақын. Құрылыс-монтаж жұмыстарын 20 тамызға дейін аяқтау жоспарланған.
– Вокзалдар – өңірдің келбетін айқындайтын маңызды нысандар. Сондықтан оларды заманауи талаптарға сай жаңғырту тұрғындардың жайлылығын арттырып қана қоймай, өңірдің көлік әлеуетін де күшейтеді. Барлық жұмыс аяқталғаннан кейін облыс тұрғындары мен қонақтары сапалы қызмет көрсететін, қолайлы әрі заманауи вокзалдарды пайдалана алады, – деді Нұрлыбек Нәлібаев.
Жалпы Ақтөбе облысында жеті теміржол вокзалы жаңғыртылып жатыр. Олар – Ақтөбе, Қандыағаш, Шалқар, Жем, Алға, Шұбарқұдық және Қарауылкелді станцияларындағы вокзалдар. Қазіргі уақытта Шалқар мен Шұбарқұдық вокзалдарындағы құрылыс-монтаж жұмыстары толық аяқталды. Қалған нысандарда жұмыстар жалғасып жатыр. Жобалардың жалпы құны 10,5 миллиард теңгеден асады.
Мемлекет басшысының тапсырмасымен елімізде 124 вокзалда жаңғырту жұмыстары бір мезетте басталғаны белгілі. Көлік инфрақұрылымын заман талабына сай жаңартып, жолаушыларға көрсетілетін қызмет сапасын арттыру, қауіпсіз әрі жайлы жағдай қалыптастыру көзделген. Ақтөбе қаласының теміржол вокзалы – осы бағдарлама аясында жаңартылып жатқан маңызды нысандардың бірі.
Жұмыстар Мемлекет басшысының тапсырмасы бойынша ҚР Көлік министрлігінің, «Самұрық-Қазына» АҚ және облыс әкімдігінің қолдауымен «Қазақстан темір жолы» ҰК» АҚ өз қаражаты есебінен орындалуда. Бүгінгі таңда 70 вокзалда құрылыс жұмыстары аяқталып, бірінен соң бірі пайдалануға берілуде.