Ақтөбе өңірінде жүк тасымалы артты

«Қазақстан темір жолы» ҰК» АҚ «Ақтөбе магистральдық желі бөлімшесінде жартыжылдық өндірістік-эксплуатациялық көрсеткіш оң нәтижемен қорытындыланды.

Алғашқы алты айда бөлімшеде жүк тиеу мен түсіру жоспары жоғары көрсеткішке жетті. Бөлімшенің техникалық бөлім бастығының орынбасары Әдия Абдуллинаның айтуынша, есепті кезеңде Ақтөбе өңіріндегі жүк айналымы жоспарға шаққанда 101,1 пайызды құрады. Ал жүк тиеу көрсеткіші 104,8 пайызға орындалды. Алты айда өңір бойынша 7 млн 853 мың тонна жүк тиелген. Бұл жоспарланған көлемнен 357 мың тоннаға артық.

Биыл өңірде жүгері тасымалы жоғары. Жүк тиеу көрсеткішіндегі үлесі 42,6 пайызды құрайды. Одан кейін темір рудасы – 24,4 пайыз, түсті руда – 17,6 пайыз, мұнай – 4,8 пайыз, қара металл – 3,8 пайыз және химиялық өнімдер – 1,4 пайыз. Ақтөбе өңірінен жөнелтілген жүктердің 92,6 пайызы Қазақстан ішіндегі кәсіпорындар мен ұйымдарға тиесілі болса, 7,4 пайызы шет мемлекеттерге экспортталған. Бөлімшенің Орал өңірі бойынша көрсеткіштері де жоғары. Мұнда жүк тиеу жоспары 112,5 пайызға орындалды. Нақты көлем 1 млн 275 мың тоннаны құрап, жоспардан 141 мың тоннаға артық. Әлия Еділқызының баяндауынша, жүк айналымы – 101,1%, жүк тиеу – 104,8%, техникалық жылдамдық 100,1% құрайды.  

Алғашқы жартыжылдықта өндірістік жарақат алу жағдайы тіркелмеген. Қызметкерлердің қауіпсіздік талаптарын сақтауына бақылау күшейтіліп, нұсқаулықтар жаңартылған. Сонымен қатар барлық деңгейдегі басшылардың еңбекті қорғау талаптарының бұзылуына қатысты жауапкершілігі артқан. Бұл жазатайым оқиғалардың алдын алу және қызметкерлер арасында қауіпсіздік мәдениетін қалыптастыру бойынша жүйелі жүрген жұмыстар нәтижесі деген жөн.