Жүктемесі жоғары өткелдерде рейд өтті

Ақтөбе облысында «Заң мен тәртіп» тұжырымдамасы аясында «Қауіпсіз өткел» республикалық профилактикалық акциясы өтіп жатыр. Әсіресе жүктемесі жоғары өткелдерге басымдық берілуде.

Өткен апта теміржолшылар, көлік полициясы, көліктік бақылау инспекциясы, прокуратура және жергілікті атқарушы орган өкілдерінің қатысуымен Ембі қаласындағы Ақтөбе – Жем учаскесінің Құдық – Жем аралығындағы өткелде кезекті акция ұйымдастырылды. Біршоғыр жол дистанциясы өткізген профилактикалық іс-шарада 87 жеңіл көлік және 45 жүк көлігі жүргізушілеріне қауіпсіздік талаптары түсіндірілді.  

Аталған өткел өңірдегі жүктемесі жоғары өткелдің бірі саналады. Үлкен жүк көліктерінің ағыны жоғары, «AltynEx Company» АҚға тиесілі жүк көліктерінің басты жолы. Жүргізушілерге ақпараттық жадынамалар таратылып, профилактикалық әңгімелесу өткізіп, талап бұзғандарға жауапкершіліктің қатаңдығы ескертілді.  

Ақтөбе магистральдық желі бөлімшесінің хабарлауынша, «Қауіпсіз өткел» акциясы Қандыағаш қаласында да өткізілді. Қандыағаш – Шұбарқұдық учаскесінің Қандыағаш – 6-разъезд станциялары арасындағы теміржол өткелінің де жүктемесі өте жоғары. Мұнда тәулігіне 32 жұп жүк және 8 жұп жолаушылар пойызы өтеді. Сонымен қатар өткел арқылы қалалық автобус бағыттары қатынайды. Қандыағаш, Жем және Мұғалжар ауданының елді мекендері арасындағы автокөлік қозғалысы да осы өткелден өтеді. Бұл жерде 123 жеңіл көлік және 45 жүк көлігі жүргізушісі қауіпсіздік мәселелері бойынша нұсқамадан өтті.  

– Теміржол өткеліндегі қауіпсіздік – тек теміржолшылардың емес, жол қозғалысына қатысушылардың барлығына ортақ жауапкершілік. Қарапайым ережені сақтау адам өмірін сақтап қалуы мүмкін. Сондықтан мұндай түсіндіру жұмыстары тек бір реттік акция емес, тұрақты жүреді, – деді Қандыағаш локомотив пайдалану депосы басшысының өндіріс жөніндегі орынбасары Азамат Қалниязов.