Қызылордада теміржолшылар «Әл-ауқат апталығын» бастады

Қызылорда бөлімшесінде денсаулық мәдениетін дамыту, кәсіби тәуекелдердің алдын алу, жұмыс орнындағы күйзелісті азайту және салауатты өмір салтын насихаттау мақсатында «Әл-ауқат апталығын» қолға алды.    

Теміржол – жоғары жауапкершілік пен үздіксіз ырғақты талап ететін күрделі өндіріс орны. Бұл салада қызмет ететін әрбір маманның денсаулығы мен психологиялық жай-күйі өте маңызды. Сондықтан аптаның дүйсенбісін Сұлтанахмет Жантөреұлы бастаған Қызылорда ЖТ бөлімшесінің ұжымы таңғы сергіту жаттығуынан бастады. Спорт секторы Бақытжан Имбергенов арнайы спорттық жаттығулардың бірнеше түрінен үлгілік нұсқа көрсетті. Әріптестері оның әрбір әрекетін қайталап, бойларына серпін, саналарына сергектік, зерделеріне зия жинады.

Денсаулық пен ұжымдық рухты ұштастыруды көздеген таңертеңгілік сергіту теміржолшылардың физикалық, психологиялық және әлеуметтік әл-ауқатын арттыруға, жұмыс күннің сәтті өтуіне оң ықпал ететіні дау туғызбайды.    

Әрі қарай бөлімшенің кәсіподақ ұйымы тарапынан арнайы жайылған жеңіл дастарханнан дәм татқан қызметкерлер жұмыс орындарына көтеріңкі көңіл күймен сергек тарасты.    

– Бөлімше теміржолшыларының денсаулық мәдениетін дамыту, олардың физикалық, психологиялық және әлеуметтік әл-ауқатын жақсарту, кәсіптік тәуекелдердің алдын алу, жұмыс орнындағы күйзелісті азайту мақсатында Еңбек қауіпсіздігі және еңбекті қорғау, экология бөлімінің жетекші инженері Бақыт Айменова мен кәсіподақ комитеті төрайымы Ғалия Қожахметова бірлесіп осындай апталықты қолға алып, жоғары деңгейде өткізуге атсалыстық. «Әл-ауқат апталығы» кеңседе отырып күнделікті 8 сағат жұмыс істейтін қызметкерлерге сергектік сыйлап, ұжымдық ауызбіршілікті шыңдауға бағытталған маңызды шара болды. Сергіту жаттығуларынан бастау алған күн әрбір қызметкерге ұмытылмас әсер сыйлап, еңбек өнімділігін арттыруға тың серпін бергені анық, – дейді спорт инспекторы Бақытжан Имбергенов.