Қауіпті де қатерлі аймақ
Теміржол қашаннан қауіпті аймақ болып саналады. Мыңдаған тонна жүк тиеп, жолаушы алып жүйткіп келе жатқан пойыздың жолына көлденең келген жанды да, жансыз да аждаһаның аузына жұтылғандай күй кешері сөзсіз.
Мұндай оқиғалардың соңы көбіне қайғылы жағдаймен аяқталары айтпаса да түсінікті. Күтпеген жерден шойын жолда пайда болған мал мен жанды басып кетпес үшін машинист жедел тежегішті іске қосқанымен, дер кезінде тоқтата алмасы анық. Жедел тежегішті қосқандағы толық тоқтау жолы 500-ден 900 метр аралығын құрайды.
Өткен жылдың статистикасына жүгінсек, Қазақстан бойынша 19 қайғылы жағдай орын алып, оның ішінде жеті оқиға 8-17 жас аралығындағы жасөспірімдерге қатысты болған. Соңғы кезде, өкінішке орай, адамдардың өзін-өзі өлтіру деректері көбейіп барады, ол үшін пойыз жолды таңдайтындар аз кездеспейді. Адам өз-өзіне қол жұмсап, пойызға түсер алдында оны басқан машинистің де өмір бойы психологиялық күйзелісте болатынын ескермейтіні өкінішті.
«Әр адам өз өміріне өзі жауапты. Сондай-ақ тұрғындар жайылымда жүрген малына ие болса, әсіресе, шағын станциялар мен айырықтарда тұратын адамдар, көлік жүргізушілері жолда көлікті мұқият жүргізсе, кез келген оқиғаның алдын алуға болады. Темір жол бойындағы титтей қателіктің соңы орны толмас өкінішке айналып кетпесін десек, өмірімізге, айналамыздағыларға асқан жауапкершілікпен қарағанымыз дұрыс. Ата-ана, мектеп мұғалімдері теміржолдың бойы ойын алаңы емес екенін балаларға әрдайым түсіндіріп отыруы қажет. Мектептерде осы орайда жол қауіпсіздігі тақырыбына арналған тәрбие сағаттары, семинарлар өткізілуі керек», – дейді Түркістан станциясының еңбек қорғау инженері Ләззат Рысбаева.
Еңбек қорғау инженерінің айтуынша, темір жол бойына кездейсоқ зат тастауға және белгіленбеген жерден өтуге қатаң тыйым салынатыны, малды шойын жолдан 200 метрге дейін тек арқандап жаюға болатыны, т.т. талапты орындамай, темір жол қауіпсіздігіне қасақана қауіп төндіргендер қылмыстық жауапқа тартылатыны сынды ережелер теміржолшылар тарапынан ұдайы ескертіліп отырады. «Адамдардан талап ететініміз, тек қауіпсіздік. Темір жол өткелдерінен өтерде жол ережесін қатаң сақтап, өзінің де, өзгенің де өміріне қауіп-қатер әкелмей, тек белгіленген жерден ғана өту қажет және жолдан өтер алдында келе жатқан пойыздың жоқтығына әбден көз жеткізіп алған абзал екенін ескертеміз. Оның түк те қиындығы жоқ, ендеше осы қарапайым қағиданы сақтауға неге құлықсызбыз?» дейді еңбек қорғау инженері.
Жансая Сыдықбай, Түркістан облысы
Суретті түсірген автор