Өткелдер тексеру айлығы жалғасуда
Наурыздың 26-сы мен сәуірдің 26-сы аралығында өтіп жатқан «Абайла, өткел!» айлығына Ірілендірілген Астана жол дистанциясының мамандары бір кісідей атсалысуда.
– Темір жол өткелі – бір деңгейде орналасқан темір жол және автомобиль жолдарының қиылысқан жеріндегі қауіптілігі басым нысан. Ол қозғалыс қауіпсіздігін қамтамасыз етіп, көлік құралдары мен пойыздардың өту жағдайын жақсартатын қажетті құрылғылармен жабдықталады. Соған қарамастан соңғы кезде ел ішінде өткелдерде азаймай тұрған апаттарға байланысты біз компания басшылығы тарапынан түскен бұйрықпен өткелдерді қатаң тексеруге алуды тоқтатпаймыз, – дейді өткен аптада айлық бойынша тексеру жұмысына қатысқан дистанцияның өндірістіктехникалық бөлімінің жетекші инженері Айгүл Төрежанова.
Оның айтуынша, өткел кезекшілері профилактикалық жұмысты ұдайы жүргізеді. Айлық аясында өткелдер нұсқаулығы талаптарына сай тексеру жасалады. Соның нәтижесінде анықталған кемшіліктерді жою бойынша жауапты адамдарды бекітіп, олқылықты жоюдың күнтізбелік жоспары, жұмыс көлемі анықталатын акт толтырылады. Автоматтандырылған өрт белгі беру жабдығы жоқ өткелдерде механикаландырылған шлагбаумның жарамдылығына үнемі бақылау қойылады. Теміржолшылар өткелдердің техникалық жарамды жағдайын, белгілер мен бағдаршамдардың дұрыс көрінуін қамтамасыз етіп, жолға кедергі келтіретін ағаштар мен бұталар кесіледі. Ай сайын халық арасында және ұйымдарда темір жол өткелінен өту бойынша профилактикалық жұмыстар жүргізу туралы ауылдық және аудандық әкімдіктерге ақпараттық хаттар жолданады. Сондай-ақ айына құқыққорғау органдарына автокөлік құралдары жүргізушілерінің өткелді дұрыс кесіп өтпеуі жағдайына орай мәліметтер жіберіледі. Жол жүру ережелері бұзылуына орай телеарналарда бейнероликтер көрсетіліп, жергілікті газеттерде олардың бұзылу себептері мен салдары туралы мақалалар беру үшін жол полициясы, жол дистанциясы басшылығының қатысуымен бірлескен шаралар өткізіледі. Өткел кезекшісінің қызметтік міндеттемелері мен 2013 жылғы 16 желтоқсандағы №1627ЦЗ нұсқаулығы талаптарын сақтау мақсатында күзетілетін өткелдер тосыннан және түнгі уақытта тексеруге алынады.
Мамандардың айтуынша, өткелдерде ескерту, хабарлаушы, өткелдік сигнализациялар болады. Біріншісі, пойыздар мен маневрлік құрамға арналған. Ол өткел кезекшісі басқаратын және өткел алдына қойылатын ескерту бағдаршамдары. Екіншісі арқылы кезекші пойыздың өткелге жақындап қалғанын оптикалық және акустикалық белгілер арқылы біледі. Ал өткелдік сигнализация көлік құралдарына арналған бағдаршам және жаяу жүргіншілерге арналған дыбыстық сигнализациядан және электрлі рельс тізбектері аппаратурасынан тұрады.
Райхан РАХМЕТОВА