4 жүк вагонының ақаулы екенін анықтады
Қазалы вагон пайдалану депосының вагон қараушыларының қырағы назарынан ақаулы вагон таса қалып көрген емес.
Ақпанның ақ түтек боранды күндері бөлімше бойынша тәулігіне өтетін 10 шақты жұп жүк пойызы мен 19 жұп жолаушы пойызының құрамдарынан бір емес, төрт жүк вагонының ақаулы екенін анықтап, жылжымалы құрамды апаттан аман алып қалған теміржолшылар: Қызылорда техникалық қызмет көрсету пунктінің вагон қараушылары Сейтмек Онбаев, Дархан Тажимов және Сексеуіл техникалық қызмет көрсету пунктінің вогоншылары Ербол Құлжанов, Жәнібек Әубакіровтердің ерен еңбегін қалай жарнамаласақ та жарасады.
Еске сала кетсек, пойыздардың қозғалыс қауіпсіздігін сақтауды арттыру және жүк вагондары арбашасының құйылмалы тетіктерінің сыну жағдайының алдын алу мақсатында, өткен жылдың желтоқсан айында «ҚТЖ» компаниясы Қозғалыс қауіпсіздігі департаментінің директоры М.Шакеновтың №ЦУДБ/334-И нөмірлі пәрмені бойынша биылғы жылдың наурыз айының 23-не дейін «Бүйір рамаларын тексерудің» төрт айлығы жарияланған еді.
Төрт айлық тексеруге жұмыла кіріскен аймақ вагон қараушыларының аяқ алысы жаман емес.Тәжірибелі вагон қараушы-жөндеуші Дархан Тажимов 5 ақпан күні Қызылорда станциясына келіп тоқтаған №2839 пойызды тексеріп, техникалық қызмет көрсету кезінде құрамның 18-вагонының 2-арбашасының 1291 таңбалы №47328 нөмірлі сол жақ бүйір рамасының ішкі бетінен 180 мм, сыртқы жағынан 270 мм көлемде жарықшақ анықтаған. Ал 20 ақпан күні №3473 пойызға техникалық қызмет көрсетіп жүрген Сейтмек Онбаев 2-арбаның оң жағындағы технологиялық шұқыр ішінің екі жерінен 5 және 10 мм көлемінде жарық анықтаған.
– Ақаулы вагон пойыз құрамынан ажыратылып, Қазалы вагон жөндеу депосынан дефектоскопиялық сараптамадан өткізіледі. Ақауды вагон қараушы тапқанымен оның ақаулылығын сараптама қорытындысы көрсетеді. Біздің вагоншылар міндеті – ақаулы вагонды анықтап, қозғалыс қауіпсіздігінің сақталуына үлесін қосу, апаттың алдын алу. Қазір вагон қараушылардың өздерінің тарапынан жұмысқа жауапкершілікпен қарау күшейді, ақаулы вагонды тауып марапатқа кенелсек деген құлшыныс артқаны байқалады. Мұның өзі теміржолшыларды ынталандырып, жұмысқа жаңа серпін береді , – дейді Қызылорда ТҚКП басшысы Рүстем Ұзақбаев.
Азамат ҚҰЛЫМБЕТ, Қызылорда