Жол бойын жаяу аралады

Маңғыстау станциясы басшылығының ұйымдастыруымен өткен «Темір жол – аса қауіпті аймақ» атты кезекті рейдке теміржолшылармен қатар құқыққорғаушылар, ауыл әкімдігі өкілдері де атсалысты.

Маңғыстау станциясы директорының орынбасары Айбол Есмұхановпен бірге Маңғыстау ауылы әкімінің орынбасары Айдос Елемесов, Маңғыстау станциясындағы желілік полиция бөлімшесінің инспекторы Нұрлыбек Рахметов, Әскерилендірілген теміржол күзеті қызметі шұғыл әрекет ететін оңтайлы тобының аға күзетшісі Жұбаныш Ізбанов, күзетші Сағындық Тұрақбаев теміржол бойын жаяу аралап, тұрғындармен тілдесіп, теміржолда адам мен қараусыз жүрген малды басу оқиғаларының көбейіп кеткенін, оның салдары туралы түсінік жұмыстарын жүргізді. Теміржолда қауіпсіздік ережелерін сақтау қажеттігін айтып, тәртіпке бағынбаған жүргіншілерге заңдық шара қолданылатынын да ескертті. Белгіленбеген жерлерден теміржолды кесіп өтіп бара жатқан азаматтарды анықтап, жеке-жеке сөйлесті.

– Маңғыстау станциясында, өкінішке орай, бала да, шаға да, ересектер де теміржолдың белгіленбеген жерінен өтетін жағдай көп кездеседі. Жолға барлық ескерту белгілері ілінгеніне қарамайды. Сондықтан оларға мұндай әрекеттің арты өміріне қандай қауіп пен қатер төндіретінін ескертіп және балаларының теміржол аумағына ойнауға жібермеуді қатаң қадағалау керектігін айтудай-ақ айтудамыз. Жақын ауылдардың балалары теміржолда ойнап жүреді. Кейде олар жолға тас, бөгде заттарды қойып кетеді. Оны да айттық. Сондай ақ, теміржол мүлкін ұрлаудың да салдарын түсіндірдік, – дейді Маңғыстау станциясы директорының орынбасары А.Есмұханов.