Антиэпидемиялық шаралар – өз күштерімен

Республикалық «Біз біргеміз!» акциясына теміржолшылар да үн қосып, елімізде қалыптасып отырған жағдайға байланысты бірқатар тың шаралар легін бастады.

Қазіргідей елімізде төтенше жағдай жарияланған шақта Қазақстан халқына бір жағадан бас, бір жеңнен қол шығара отырып тірлік жасау арқылы ғана тығырықтан шығуға жол табылмақ. Сондықтан, семейлік теміржолшылар қол қусырып қарап отырмай іске кірісті.

Жергілікті теміржолшылар арасында «сушылар» аталатын «Теміржолсу» АҚ қызметкерлері тек таза ауызсумен ғана қамтып қоймайды. Желі бойындағы су беру нысандары мен қатар қажетті жағдайда жекелеген теміржол құрылымдарына, вагондар мен тепловоздарға залалсыздандыру жұмыстарын жүргізуге де құқылы. Міне, осы мүмкіндікті пайдаланған олар күллі бөлімше бойынша «Біз біргеміз!» акциясы аясында тегін антиэпидемиялық шараларды бастады. Әуелгі кезекте желі бойындағы шағын станциялардағы ауызсу модульдері мен скважиналарды, құдықтарды толықтай залалсыздандырған су берушілер өзге әріптестерінің өтініші бойынша теміржол шаруашылықтарының көптеген нысандарын хлор ерітіндісімен өңдеуден өткізуге кірісті.

– Расын айтқанда, қатерлі вирустың алдын алуда мұндай санитарлық шаралардың берері мол. Әйтседе, үлкен қалада залалсыздандыру жұмыстарын жүргізуге арнайы рұқсаты бар мекемелер некен-саяқ. Мәселен, радиологиялық химия және биологиялық қорғаныс саласының әскерилері қаладағы қоғамдық орындарды, қалаішілік жолаушылар көліктерін, жол бойын дезинфекциялап үлгермей жатыр. Ал, арнайы сертификаты бар жекеменшік мекемелерге қомақты ақы төлеу қажет болады. Сол себептен де өзіміздің «Теміржолсу» мекемесінің осындай сәттерде көмекке келгені қуантады, – дейді оларға ризашылық білдірген жергілікті теміржол шаруашылығының мамандары.

Республикалық «Біз біргеміз!» акциясы аясында Семей станциясының сушылары алдымен Жаңа-Семей жол дистанциясы мен ПЧ-39 мекемесінің құрылымдарына толықтай залалсыздандыру жұмыстарын жүргізді. Мұндай дезинфекциялық өңдеуден бірінші кезекте дистанциялардың шеберханалары өткізілді. Сондай-ақ, станция басындағы маневрлік тепловоздар мен желі бойындағы шағын станцияларға су тасымалдайтын цистерналар да санитарлық талапқа сай тазартылды.

– Ұжым мүшелерімен ақылдаса отырып, осындай шешімге келдік. Ұсынысымызға басшылық та қолдау білдірді. Осы апта Семейдің өз басындағы жұмыстарды сәтімен аяқтадық. Егер облыстық әкімдік рұқсат берсе, Защита, Серебрянка, Зырян станциялары бойынша жұмыс жүргізуге әзірміз. Жалпы, бұл шараны қауіпті індет жойылғанша жалғастыра беретін боламыз, – дейді «Теміржолсу» АҚ Семей бөлімшесінің басшысы Сырым Сағымбаев.

Жалпы, мұндай жұмыстарды жүргізу үшін құзырлы орындардың арнайы рұқсаты керек. Хлор ерітіндісімен жұмыс істеу адам өміріне қауіптілігі жөнінен екінші орында тұр. Сондықтан оны теміржолсу тәрізді арнайы шаруашылық мамандары атқарғаны құба-құп. Айта кетерлігі, қазіргі күні мекемеде дезинфекция жүргізуге арналған құрал-жабдықтар мен арнайы халаттар, газдан сақтану тұмылдырығы сынды бұйымдар толық, хлор ерітіндісі де жеткілікті. Жұмыс тоқтаусыз жүргізіліп жатыр. Ұжым мүшелері осынау игілікті бастаманы қолға алулары себепті жұмысшыларды ақысыз демалысқа жіберуден сақтап та отыр. Мұның өзі қазіргідей елдегі күшейтілген карантин жағдайында олардың әлеуметтік ахуалын тұрақтандыруға үлкен себеп.

– Біріксек – бәрін жеңеміз, бұл қиындықты да өткереміз. Біріміз – бәріміз үшін, бәріміз – біріміз үшін! – дейді шығыстағы теміржолшылар қауымы.