Ерте қамданды

Ақтөбе жол дистанциясы ел басына төнген індеттен қорғайтын санитарлық-гигиеналық заттармен қамтамасыз етуді бір ай бұрын қолға алған.

Жолшылар ұжымының ерте қамданғанының арқасында 21 наурыздан бастап белизна, антисептик, сабын секілді гигиеналық заттарды барлық мекемеге толық таратып үлгерген. 6 сәуір күні Ақтөбе қаласы карантинге жабылған сәттен бастап, санитарлық заттар қосымша тағы да таратылды. Жіңішке, Ақтөбе, Тамды, Бестамақ, Алға аумағында жүрген жолшылардың барлығы қорғаныш құралдарымен қамтылды.

– Бұл – біздің еліміздің ғана емес, бүкіл әлемнің басына түскен сынақ. Осындай жағдайда дертпен күресті әр адам жеке басынан бастауға тиіс. Осы тұста бір-бірімізге қол ұшын бергеннің орнына, қажетті заттардың бағасын көтеріп, бетперделерді қымбатқа сатып жатқан алыпсатарлар жоқ емес. Сол үшін де кәсіподақ қорынан қызметкерлеріміз қала кезіп қиналмасын деген оймен ательеге көп киюге жарамды бетперде тіктірдік. Барлығы 720 бетпердеге тапсырыс берілді. Әр жұмысшыға 2 данадан таратылды, – дейді Ақтөбе жол дистанциясының кәсіподақ төрағасы Елжан Жұмабаев.

Жол дистанциясының қызметкерлері науқастанып қалған әріптестеріне де қолдау жасап, отбасының жалғыз асыраушысы ауруханада жатқанда оның шиеттей бала-шағасына азық-түлік жеткізді.

- 38 разъездегі бір жолшымыз асқазаны ауырып, қаладағы ауруханада жатыр. Оның отбасына біршамаға жететін азық апарып бердік, – дейді Елжан Жұмабаев.