7 рет адам басып кету фактісі тіркелген
Маңғыстау облысы бойынша меншікті тілші
Бейнеу станциясында жаяу жүргіншілер мен автокөліктер жүруге, тіпті мал айдап өтуге де арналған өткелдер бар. Бірақ соған қарамастан жергілікті халықтың теміржолды кез-келген жерден кесіп өтуіне тыйым болмай отыр.
Бейнеу станциясының қозғалыс қауіпсіздігі инженері Ғалым Қанатовтың айтуынша «ҚТЖ-Жүк тасымалы» АҚ-ның ағымдағы жылдың бірінші тоқсанына жүргізген сараптамасы бойынша теміржолдың магистральдық желісінде 7 рет адам басып кету фактісі тіркелген.
Ал Маңғыстау бөлімшесінде осы уақыт ішінде 59 рет шұғыл тежегішті пайдалану жағдайы тіркелген. Оның үшеуінде мал басылса, екеуінде пойыз бен автокөлік соқтығысқан. Бірі Өзен станциясындағы «Зинулин» ЖК кірме жолындағы күзетілмейтін өткелде, екіншісі «Р» бекеті мен Боржақты бекеті аралығында автокөліктің теміржолға шығып кетуінен болған жол-көлік апаты. Аталған деректердің барлығы да тұрғындардың теміржол бойында қауіпсіздік шараларын сақтамауынан орын алған. Сол себепті Маңғыстау бөлімшесі бойынша әрбір станцияда желілік полиция қызметкерлерімен бірге тұрғындармен кездесіп, түсінік жұмыстарын жүргізу тоқтаған емес.
Қозғалыс қауіпсіздігі инженерінің айтуынша, ең үлкен жетістік, тұрақты жүргізілген профилактикалық шаралар нәтижесіз емес, жыл басынан бері Бейнеудің басында немесе онымен көршілес бекеттердің аралығында адам басу оқиғасы орын алмаған.