«Open space» кабинеті ашылды

«ҚТЖ- ЖТ» АҚ Ақтөбе жүк тасымалдау бөлімшесі ғимаратында ашық форматтағы «Open space» кабинеті ашылды. Енді тек теміржолшылар ғана емес, кезкелген қала тұрғыны алпауыт компаниямен ашық байланыс орната алады.

«Open space» қағидаты бойынша жұмыс істейтін кабинеттің ашылу рәсіміне Ақтөбе ЖТ бөлімшесінің бастығы Бөріхан Беркімбаевтың өзі қатысты.

Сонымен қатар, Ақтөбе облысы бойынша сыбайлас жемқорлыққа қарсы қызмет басшысы Мирлан Мұхамбетов пен «Ақтөбе-адалдық алаңы» жобалық кеңсесінің басшысы Жанболат Тортаев бөлімшеге арнайы келді.

Жаңа орталық филиал басшылығына теміржол тасымалы саласын дамыту мәселелері бойынша ұсыныс-талаптарды тыңдап, жүзеге асыруға дайын.

Енді әрбір азамат аталмыш кабинет арқылы оператордан консультациялық кеңес немесе қызметтер алып, адалдықтың ала жібін аттаған қызметкерлердің үстінен шағым түсіре алады.

«Президент Қасым-Жомарт Тоқаевтың халыққа арнаған Жолдауында айтылғандай, теміржол саласы да «Халық үніне құлақ асатын мемлекет» тұжырымдамасын орындауды қолға алып отыр. Осы жоба негізінде барлық қызмет түрлерінің ашықтығы қамтамасыз етіледі. Кез келген мәселені шешуде қолжетімділік пен жеделдікке баса назар аударылатын болады»,- деді Ақтөбе ЖТ бөлімшесінің бастығы Бөріхан Беркімбаев.

Ақтөбе облысы бойынша сыбайлас жемқорлыққа қарсы қызмет басшысы өз кезегінде бұл облыстағы 62-ші «Open space» форматындағы кабинет екенін және оның басты ерекшелігі – мемлекеттік сыңайлы сектор субъектісінде ашылуы жетістік екенін тілге тиек етті.

Айта кетейік, «Жолаушылар тасымалы» АҚ 2018 жылдың тамыз айында Сыбайлас жемқорлыққа қарсы агенттікпен «Адал жол» жобалық кеңсесін құру туралы келісімге қол қойған.

Жоба теміржол тасымалының сапалы жұмыс істеуін қамтамасыз етуге, халыққа көрсетілетін қызметтің сапасы мен қолжетімділігін арттыруға жұмыс істейтін болады.

Ең бастысы тұрмыстық сыбайлас жемқорлықты жоюға бағытталған жұмыстарды бірлесіп жүргізуге басымдық беріледі. Жаңа нысан халықпен жұмыстың жаңа форматында қызмет көрсетуді бастап кетті.