Қоршауды бұзып өтеді
Ақтөбе облысы бойынша меншікті тілші
Қауіпсіздік – теміржол көлігі үшін ең маңызды мәселе. Жасыратыны жоқ, адамдар көп жағдайда өз өмірі мен денсаулығына салғырт қарайды. Өңірде қайғылы жағдай тіркелген жерлердің барлығы – тұрғындарға жүруге тыйым салынған аймақтар.
Теміржолшылар қауіпті тұстағы қоршауларды тікенекті сыммен бекітіп, жүргіншілердің өтуіне барынша бөгет болғанына қарамастан, қоршауды бұзып, өздері жасап алған қауіпті жерлерден өтуге құмарларды тоқтату қиынға соғып отыр.
«Тұрғындарға сақтық шараларын ескеруді, тек белгіленген жерлермен жүруді айтып келеміз. Қоршауларды бұзып кету жағдайы қиындық туғызып отыр. Ескертуге құлақ аспағандар қоршауларды бұзып, теміржолдың үстінен емін-еркін жүретін жол салып алады. Және ол жерден күндіз де, түнде де өтеді. Биыл жыл басынан бері ел аумағында жылжымалы құрамның адам қағуына байланысты 10 жағдай болды. Абырой болғанда, Ақтөбе және Орал аумақтарында қайғылы жағдай тіркелген жоқ, бірақ жылдың жартысы да өтпегенін ескерсек, қуануға әлі ерте екенін түсінеміз», – дейді Ақтөбе станциясы басшысының орынбасары Асан Жұмағұлов.
Естеріңізге салсақ, Ақтөбеде 2019 жылдың 4 желтоқсанында қозғалып келе жатқан пойызбен жарысып селфи жасамақ болған қыз бала қаза тапқан болатын. Осындай жағдайлар қайталанбауы үшін теміржолшылар қайғылы орын болған жерде жиі рейд өткізеді.
Және бұл орындағы қоршаулар бірнеше қабатты тікенек сымдармен бекітілген. Бірақ қаншама еңбекті бір күн де тұрғызбай, тұрғындар сымды кесіп, қоршауды бұзып кетеді екен...