Жіңішке - өндірістік аудан
Ақтөбе облысы бойынша меншікті тілші
Жіңішке - Ақтөбе жол бөлімшесіндегі өнеркәсіптік аумақта орналасқан табысты жүк станцияларының бірі. Облыста металлургия, химия, мұнай өнеркәсібі және ауылшаруашылығы жақсы дамығанын ескерсек, станцияның географиялық орналасуы да тиімді жерде.
Ондаған өндіріс орындарының орналасқан станция биылғы жылды жақсы көрсеткішпен бастады. Әлемді шарпыған дағдарысқа қарамастан, Жіңішке станциясы бес айда жүк тасымалы жоспарын артығымен орындады.
Әсіресе, құрылыс материалдары мен металл тиеу көрсеткіші бірнеше пайызға артып, 20 мың вагонға жуық жүк түсірілген.
Ал тиеу жұмыстарын 122,2 пайызға жоғары көрсеткішпен орындаған станцияда 139 224 тонна жүк жөнелтілген. Бес айдағы берекелі жұмыс жайлы Жіңішке станциясының басшысы Талғат Сағынов айтып берді. «Экономиканың дамуы тасымалдың өсіміне, жүк тасымалының деңгейі инвестицияға оңтайлы әсер ететінін білеміз.
Әлем пандемияға қарсы күрес жариялаған тұста да жүк тасымалының жұмысы тоқтаған жоқ. Қызметкерлердің барлығын қауіпсіздік құралдарымен қамтамасыз етілді. Қолғап, маскамен жүру, еңбек қауіпсіздігінің сақталуы қатаң бақыланады. Таңның атысы, күннің батысы жүк тиеліп, түсіріліп жатады»,-дейді Жіңішке жүк станциясының басшысы Талғат Сағынов.
Станцияда жоспар бойынша мамыр айында 4396 вагон жүк түсіру қажет болса, ол 4397 вагонға орындалған. Оның ішінде 1679 вагон кен өнімдері түсірілген. Мамандар құймалы жүк тасымалы 51 пайызға төмендеп, едәуір азайғанын да жеткізді. Жыл басынан бері станцияда 19 771 вагон жүк түсірілген.
Жоспар бойынша 20 099 вагон. Олардың денін әктас, күкірт, сода, түрлі металдар, кен және ферроқорытпа өнімдері құрайды.
Жүк тиеу жұмыстарының көрсеткіші де жаман емес. Мамыр айында 124 031 тонна / 2030,5 вагон жүк тиеу жоспарланса, орындалуы - 139 224 тонна / 2354 вагонды құрайды. Тонналық жоспар 122,2 пайызға артығымен орындалған. Оның ішінде 482/32451 ваг / т қара металл, 93/5648 ваг / т химиялық заттар, 1163/66832 ваг / т құрылыс жүктері, 110/6974 ваг / т металл сынықтары бар.
Өңірдегі алпауыт компаниялардың бірі Ақтөбе ферроқорытпа зауытындағы жүк тасымалы жұмыстары да негізінен Жіңішке станциясы арқылы жүргізіледі. Тауарлардың дені еліміздің солтүстік облыстарынан тасымалданып жүр.
Ақтөбе рельс-арқалық зауытына қажетті шикізат жеткізіп, жүк тиеу және түсіру жұмыстары да Жіңшке станциясының еншісінде.